Jezabele weiva etyi tyaenda novauli va Baale, anumana unene. Atumu onondaka ku Eliya mbati: ‘Muhuka mankhuipaa ngetyi waipaa ovauuli va Baale.’ Eliya atili unene nowoma akahateka no moluhandya. Elikuambela okuti: ‘Jeova ame himetyivili vali okukoleleya. Mbambavo ndyeke ndyinkhie.’ Eliya ankho waponua unene alangala-po mombuelo yomuti.

Oandyu aimupahula-po aimupopila okuti: ‘Pindukapo ulie.’ Eliya amono ombolo yatokota nokatenda komaande. Eliya ali, anu iya alangala-po vali. Iya oandyu aipahula-po vali Eliya aiti: ‘Lia. Ove wesukisa ononkhono opo ulinge oungendi.’ Eliya ali vali. Waenda ovitenya 40 novinthiki 40, opo ehike Komphunda Horebe. Etyi ehika Komphunda, Eliya anyingila meleva alangala-po. Mahi Jeova emupopila okuti: ‘Oityi ukahi nokulinga kuno Eliya?’ Eliya akumbulula okuti: ‘Ova Isilayeli kavatuaileko nomphango valinga nove. Vahanya-po omitala viove tupu vaipaa ovauli vove. Pahe vahanda okundyipaa.’

Jeova emupopila okuti: ‘Enda no komphunda.’ Tete, akuya omphepo onene yakuata meleva. Akulandula, otyinimawe no tupia. Konyima, Eliya eivi ondaka imwe yapopila pombuelo. Eliya elihiki motyipala notyikutu tyae iya akala pombundi yeleva. Jeova emupulu okuti omokonda yatyi weila okuholama. Eliya ati: ‘Mokonda ame vala andyike ndyikahi nokukuumbila.’ Mahi Jeova emutolela okuti: ‘Ove kukahi awike. Nkhele kuna ova Isilayeli 7.000 vekahi nokuumbila ame. Enda kalembule Eliseu opo akale omuuli pomphangu yove’. Liwa-liwa, Eliya aende alingi etyi Jeova emutuma. Ove una umwe onthumbi yokuti Jeova mekukuatesako tyina ulinga etyi ekutuma? Enga, mekukuatesako. Tutalei etyi tyaendele-po.