Jezabelqa Baalpa profetasnin wañuchisqa kasqankuta yachaytawan mayta phiñakorqa. Chayrayku Eliasman nicherqa: “Qʼaya wañuchisqayki, imaynatachus Baalpa profetasninta wañucherqanki ajinata”, nispa. Eliastaj mayta manchikuspa chʼin lugarman ayqekorqa. Chaypitaj orakorqa: “Ay Jehová Diosníy, wañullaytaña munani”, nispa. Chantá may saykʼusqa kasqanrayku sachʼa urapi puñurparerqa.

Diospa angelnenqa payta rijchʼarichispa, calmitallawan nerqa: “Jatarikuspa mikhuy”, nispa. Eliastaj rupha rumis patapi uj tʼantata, uj yurupi yakutawan rikorqa. Chantá mikhuykuspa, ujyaspa puñurparillarqataj. Angeltaj watejmanta rijchʼarichispa nerqa: “Mikhuy, karuraj rinaykeqa”, nispa. Eliastaj uj chhikatawan mikhorqa. Chantá 40 diasta, 40 tutastawan Horeb orqokama rerqa. Chaypitaj uj chhanka juskʼuman puñoj yaykorqa. Jehová Diostaj nerqa: “¿Imatá kaypi ruwashanki?”, nispa. Eliastaj nerqa: “Israelitasqa nisusqankuta mana juntʼankuchu, altaresniykita urmarachinku, profetasniykitapis wañurachinku. Kunantaj wañuchiyta munashawanku”, nispa.

Jehová Diosqa Eliasta nerqa: “Llojsimuy, orqopitaj sayashaj qhepakuy”, nispa. Chantá sinchʼita wayramorqa, terremoto karqa, uj nina imataj karqa. Chaymanta Eliasqa uj parlayta uyarerqa, chaytaj uj kʼacha wayra silvay jina karqa. Chantá mantonwan uyanta qhataykukorqa, chay chhanka juskʼu punkupitaj sayarqa. Chaypitaj Dios taporqa imajtinchus ayqekushasqanta. Eliastaj nerqa: “Noqallaña kashani”, nispa. Jehová Diostaj nerqa: “Mana qanllachu kashanki. Israelpeqa noqata yupaychawaj 7.000 runasraj kanku. Kunanqa Eliseota nimuy cuentaykimanta profeta kananpaj ajllasqayta”, nispa. Eliastaj Diosta chay rato kasorqa. Elías jina Diosta kasukusun chayqa, Dios yanapawasun. Qhepan capitulopitaj, chʼaki tiempopi imachus kasqanmanta yachakusun.