Jezabelqa Baalpa sacerdötinkunata wanutsishqa kayanqanta wiyarirmi cölerapapis wanurirqan. Tsëmi juk willakoqta kacharqan Elïasta kënö ninampaq: “Warëqa Baalpa sacerdötinkunanömi qampis wanunki”. Tsënam Elïasqa alläpa mantsakar tsunyaqman escapakurqan. Y chärirmi kënö mañakurqan: “Jehovä, kallpämi chipyëpa ushakärishqa. Wanukïkïtam munä”. Nïkurmi retäma jawanchö utishqa punukärirqan.

Peru juk angelmi shumaqlla yatarir kuyëllapa, “sharkur pachëki mikuri” nirqan. Y sharkurirmi, achachëkaq rumikuna jananchö tantata y juk takshalla kuntuchö yakuta rikärirqan. Y mikurir y upurirmi yapë punukärirqan. Tsënam angelqa yapë kënö nirqan: “Pachëki mikuri. Porqui ëwëkanqëki sitiuman chänëkipaqqa kallpatam wananki”. Y Elïasqa yapëmi mikurirqan. Nïkurmi 40 junaq 40 paqas Horeb jirkayaq ëwarqan. Y juk machëmanmi punoq yëkurqan. Tsëchö këkaptinmi Jehovä kënö tapurqan: “Elïas, ¿imatataq këchö rurëkanki?”. Elïasnam kënö nirqan: “Israelïtakunam äniyäshunqëkita cumpliyashqatsu. Antis altarnikikunatam ushakätsiyashqa y willakoqnikikunatam wanutsiyashqa. Y kananqa noqatapis wanuratsimëtam munayan”.

Jehoväqa kënömi Elïasta nirqan: “Yarqamï y waqtachö shëkar quedakï”. Tsënam sinchipa vienturqan, patsa feyupa kuyurqan y nina rawrarqan. Tsëkuna pasariptinmi Elïasqa shumaqlla parlapäyanqanta wiyarqan. Tsëmi aqshunanwan qaqllanta tsapakurir këkanqanllachö shëkar quedakurqan. Tsënam Jehoväqa, “¿imanirtaq escapamurqunki?” nishpa tapurqan. Elïasnam, “llapan willakoqnikikunatam wanutsiyashqa, noqallanam kawëkä” nirqan. Peru Jehoväqa kënömi nirqan: “Manam japallëkitsu quedarqunki. Israelchöqa 7.000 nunakunaran adorayäman. Ëwar Eliseuta willë qampa qepëkiman pëna willakoqnï kanampaq kaqta”. Tsënam Elïasqa jinan höra ëwar Jehovä ninqanta rurarqan. Pensari, ¿wiyakoq kaptikiqa qamtapis Jehovä yanapashunkitsuraq? ¡Awmi! Kananqa rikärishun usya witsanchö ima pasakunqanta.