Jezabelca Baalpaj profetacuna huañushcata yachashpami yallitaj pꞌiñarirca. Chaimantami Baalpaj profetacunata shinallatajmi cantapish cayaca huañuchisha nichun shuj runata Eliaspajman cacharca. Eliasca achcata mancharishpami shitashca pambapi miticugrirca. Chaipimi, ‘ña mana ahuantanichu. Huañusha ninimi’ nishpa Jehovata mañarca. Eliasca yallitaj shaicushca cashpami shuj yura ucupi dormirca.

Pero, shuj angelmi Eliastaca allijlla rijchachishpa, ‘jatari micui’ nirca. Chaipimi Eliasca rumi jahuapi cunujlla tandata, puñu yacutapish ricushpaca micushpa, ubyashpa cutin dormirca. Angelca cutin rijchachishpami, ‘purinaca achcarajmi illan. Jatari micui’ nirca. Eliasca ashtahuan micurcarajmi. Qꞌuipaca 40 punllacunata 40 tutacunata purishpami Horeb urcuman chayarca. Chai urcupimi shuj jutcuman yaicushpa dormirca. Jehová Diosca, ‘¿imatataj caipica ruracungui, Elías?’ nircami. Eliasca, ‘israelitacunaca ari nishcata mana cazushpamari cambaj altarcunatapish tucui urmachircacuna. Profetacunatapish huañuchircacuna. Cunancarin ñucatapishmi huañuchisha nincuna’ nircami.

Diosca Eliastaca, ‘jutcumanta llujshishpa canllapi shayari’ nircami. Chaimanca yallitaj sinchi huairami shamurca. Chai huashaca allpapishmi chujchurca. Qꞌuipaca ninami ricurirca. Eliasca allijlla rimashcata uyashpami paipaj ropahuan ñahuita taparishpa jutcu ñaupajllapi shayarishpa saquirirca. Chaipimi Diosca imamanta miticucushcata tapurca. Eliasca, ‘ñucallamari saquirishcani’ nirca. Diosca, ‘mana canllachu cangui, ñucata adoraj 7.000 israelitacuna tiyanrajmi. Cunanca Eliseopajman ri. Paimanca, “Yaya Diosmi ñucapaj qꞌuipaca canta profeta cachun agllarca” nishpa huillagri’ nircami. Eliasca Diosta cazushpami utca rirca. ¿Elías shina cazujpica Jehová Dios cantapish ayudanata cringuichu? Ari, chaitaca crinami canchij. Cunanca usya punllacunapi ima tucushcata ricushun.