Jezabelmi yacharusqa Baalpa profetankunawan imachus pasasqanta, jinan sinchita phiñakuran. Jinaspa Eliasman willaqta kacharan: “Paqarinmi Baalpa profetankuna jina wañunki”, nispa. Eliastaq manchakuymanta ch’inneq ladoman ayqekuran, chaypin niran: “Jehová Diosniy manañan aguantanichu, wañuytan munani”, nispa. Eliasqa sinchi sayk’usqan kasharan, chaymi sach’aq ladonpi puñurapuran.

Ichaqa juj angelmi Eliasta rijch’achispa sumaqllata niran: “Sayariy, mijuy”, nispa. Jinan Eliasqa rikuran q’oñishaq rumipi t’antata jarra unutawan. Mijuspa ujaspan wajmanta puñupuran. Angeltaq wajmanta rijch’achispa niran: “Mijuy, viajanaykipaqmi kallpachakunayki”, nispa. Eliastaq mijuspa 40 p’unchayta 40 tutatawan puriran Horeb orqoman chayanankama. Jinaspa juj t’oqoman jaykuran puñunanpaq. Jinan Diosqa niran: “Elías, ¿imatan kaypi ruwashanki?”, nispa. Eliastaq niran: “Llaqtaykin prometekusqankuta mana junt’ankuchu, altarniykikunatan thuninku profetaykikunatapas wañuchinkun. Noqatapas wañuchiytan munawanku”, nispa.

Jehová Diostaq Eliasta niran: “T’oqomanta lloqsimuy”, nispa. Jinan rikuran sinchi kallpawan wayramusqanta, allpaq chhafchikusqanta, ninatawan. Chaymantataq uyariran llamp’u simiwan Diospa rimamusqanta. Chaymi Eliasqa p’achanwan uyanta tapakuspa jawapi sayaran. Diosmi tapuran imarayku ayqekusqanta. Eliastaq niran: “Noqallañan profetayki qhepashani”, nispa. Diosmi ichaqa niran: “Manan sapallaykichu kashanki, kashanmi noqata adoraq 7.000 Israel runakuna. Eliseota ajllay rantiykipi profeta kananpaq”, nispa. Kaqpachan Eliasqa Diospa nisqanta ruwaran. Qantapas, ¿yanapasunkimanchu Jehová Dios kasukuqtiyki? Arí, yanapasunkin. Kunanqa yachasun ch’akiriy tiempopi imachus pasasqanta.