И царица Иезавель уӷангля, со стердяпэ лэ Ваалостирэ пророконэнца и фартэ холяйля. Вой бишалдя каринг о пророко Илья манушэс тэ пэрэдэл алава: «Тыся ту мэрэса, сар мулинэ лэ Ваалостирэ пророкоря». О Илья фартэ пэрэдарайля и унашлятар андэ пустыня. Котэ во ля тэ мангэлпэ: «Иегова, мандэ нинай зор тэ пэрэандярав када. Дэ манди, кай тэ мэрав». Цыено, во засутя тала витка.

О анӷело жунгадя лэ Ильяс и ковлэс ԥэндя: «Ущи и ха». О Илья прошутяпэ и додиқля, кай англэ лэстэ пэ росԥабардэ бара марно, ай паша марно о кувшино паеса. Во халя, пиля и упалэ засутя. Сар прожыля найбут время о анӷело до дуйвар жунгадя лэс и ԥэндя: «Ха. Тути трэбуй зор, кай тэ жас андо дром». Важ када о Илья инке халя. После када во жалас пешком 40 деса и 40 рятя, пока на дожыля каринг о плай Хариво. Во зажыля андэ пещера, кай тэ отцыёл. Но катэ же о Иегова пушля лэстар: «Илья, со ту катэ терэс?» О Илья ԥэндя: «Израильтяноря будэр на кандэн тут. Вонэ розмардэ тирэ жертвенникоря и умардэ тирэ пророконэн. Акана вонэ камэн тэ умарэн и ман».

О Иегова ԥэндя ковлэс лэ Ильясти: «Вижа и тердю по плай». Спэрва о Илья додиқля, кай ԥурдя бари балвал, тоди и ԥув ля тэ тинойпэ, ай тоди яг. После када о Илья ашундя спокойно ӷолосо. О пророко ушарадя о муй ла йдаса и вижыля анда пещера. О Иегова пушля, васо во занашлятар. О Илья ԥэндя: «Мэ ек, ко ашэляпэ жундо». Но о Иегова ԥэндя: «Ту най екжэно. Андо Израилё исин инке 7 000 мануша, савэ кандэн ман. Рисав интя и сто пророкоса лэ Елисеёс пэ тиро ҭан». О Илья сразу жыля андо дром, кай тэ стерэл када. Сар ту гиндос, кала о Иегова ԥэнэн тути варисо тэ стерэс, тоди во поможыя тути? Да, фартэ патя, кай о Иегова поможыя тути. Ай акана уӷанаса, со стердяпэ, кала бут время на сас о брышын.