Elzaabeeli Baˈˈaali masaalaano shine gundoonnita macciishshite lowo geeshsha hanqitu. Ise togo yite Eeliyaasira sokka sokku: ‘Ateno gaˈa tenne masaalaano assini gede asseemmahe.’ Eeliyaasi lowo geeshsha waajjino daafira halallira xooqi. Isi, ‘Xaate ikkinoena shiie’ yee Yihowa huucciˈrino. Hakkunni gedensaanni lowo geeshsha daafurino daafira haqqichote hunda goxi.

Hedeweelcho sokkaasinchu daye kise, ‘Kaˈe sagale iti’ yiisi. Eeliyaasi kae laˈˈanno woyite mulesi kinchu aana raino timinna maaqqete wayi noota afi. Eeliyaasi sagale itinna waa agi gedensaanni galagale goxi. Sokkaasinchu galagale daye, ‘Haˈratto doogo seedatena kaˈe sagale iti’ yiisi. Hakko daafira Eeliyaasi sagale lexxe iti. Hakkiinni Siina Ilaali geeshsha 40 barranna 40 hashsha haˈrino. Eeliyaasi galara mittu godi giddora ei. Hakkiinni Yihowa togo yiisi: ‘Eeliyaasi, kowiicho massitanni nootto?’ Eeliyaasi togo yee qoli: ‘Israeelete manni ate ledo eino gondooro diigino. Kakkalote dargakkino diigino, masaalaanokki baala shee gudino. Kune aneno shaaera hasanni no.’

Yihowa Eeliyaasi, ‘Hakkiinni fulte ilaalu aana uurri’ yiisi. Umo, lowo bubbe dagge goda gante saˈu. Hakkiinni baatto huxidhu, hattono giira dirritu. Goofimarchoho Eeliyaasi shiima huuro macciishshi. Hakkiinni uddanotenni alba diphe godu xullichira uurri. Hakkiinni Yihowa Eeliyaasi ‘Xooqqanni noottohu mayiraati?’ yee xaˈmisi. Eeliyaasi qole, ‘Masaalaanokki shine gundeenna ani calla gatoommo’ yii. Yihowa kayinni togo yiisi: ‘Gatoottohu diate callaati. Israeelete giddo ane magansiˈrannohu 7,000 ikkanno manni no. Hadhe ate darga Elsai buuri.’ Hakkiinni Eeliyaasi hakkawoyintenni Yihowa hajajinosire assara haˈri. Yihowa hajajinonkere assinummoro isi kaaˈlannonkeha lawannohe? Ee, kaaˈlannonke. Hanni xa moollete yannara ikkinoha mitto coye laˈno.