Niromotsy Jezebela lafa naharè hoe maty iaby mpaminanini-Bala rey. Naniraky olo ie hivola amy Elia hoe: ‘Ho maty manahaky ani- mpaminanini-Bala rey koa iha hamaray.’ Navaka biby Elia, farany nilay tan-diomonto any. Nivavaky ho zao ie: ‘Tsy zakako sasy toy Jehovah. Aleo aho maty.’ Nivozaky marè Elia le niazon-droro.

Nisy anjely raiky zay namoha azy, le nivola moramora ho zao: ‘Mifohaza! Hano haninao tia.’ Nahita mofo boribory tanaboni-vato may zay Elia, le nisy rano koa ty teo. Nihina ie, le ninon-drano, bakeo niroro ndraiky. Nifohazini-anjely iny ndraiky ie, le nivolaniny hoe: ‘Mihinana fa mbo handeha lavitsy iha.’ Le nihina ndraiky Elia, bakeo nandeha 40 andro noho 40 haly zisiky amy Vohitsy Horeba any. Niroro tanaty lakato raiky zay ie lafa niavy tany. Fe hoy ty asani- Jehovah taminy: ‘Ino ataonao atoy io, Elia?’ Le hoy ty asany: ‘Nivaliky taminao Israelita rey. Naravan-drozy alitaranao rey, le nivonoan- drozy iaby ty mpaminany. Tean-drozy hovonoa koa aho henanio.’

Hoy Jehovah taminy: ‘Miboaha iha, le mitsangana amy vohitsy io eo.’ Nisy tsioky marè biby tse, le bakeo nisy horohoron-tany noho afo. Farany nisy feo moramora nireni-Elia. Nirakofany tamy siky nanaovany iny amy zay ty tarehiny, bakeo nitsanga tamonto ao ie. Nanontany azy amy zay Jehovah hoe: ‘Ino nampilay anao ’o?’ Le hoy ty asany: ‘Ka zaho raiky avao anè sisa!’ Fe hoy Jehovah: ‘Tsy raiky avao zao iha. Mbo misy mpanompoko 7 000 an’Israely any. Ndany mana amy Elisa any, le resaho fa ie ro ho mpaminany hisolo anao.’ Avy le nataoni-Elia raha nampanovini-Jehovah azy zay. Mety hampeani-Jehovah koa va iha lafa manao ze raha ampanoviny anao? Tena hanampy anao ie. Ndao hohenteantsika tse hoe ino ty raha niseho tamy fotoa tsy nisy ora rey.