Su tempong nakaringihẹ̌ apa nariadi su manga nabing Baal, Izebel sěbạe nẹ̌pědu. I sie něgělị tatanata si Elia, ’Dịěllo, i kau lai sarung mate kere manga nabing Baal ene.’ Elia sěbạe natakụ kụ timal᷊ang sarang padang gurun. I sie nẹ̌doa, ’Yehuwa, iạ seng tawe makatahang. Balạe iạ mate.’ Bọu ene, i sie nikahuntikilang su pungu kalu ual᷊ingu nal᷊owe.

Malaekatẹ̌ němuko si sie kụ nẹ̌bisara masikome, ’Pẹ̌bangungke kụ kaěng.’ Elia nakasilo piạ borotẹ̌ mal᷊imbolong su wowong batu seng nitětị dingangu tampạu inumang lohone akẹ. I sie kimaěng dingangu něnginung bọu ene saụ nẹ̌tikị. Malaekatẹ̌ ene saụ němuko si sie kụ nẹ̌bera, ’Kaěngke, tadeạu i kau matoghasẹ̌ dumal᷊eng.’ Hakị u ene, i Elia saụ kimaěng. Bọu ene, i sie liměngang 40 ěllo 40 hěbi, kụ nahumpạ su Wul᷊udu Horeb. Elia simuẹ̌ su sěmbaụ liang kụ nẹ̌tikị. Katewe Yehuwa nẹ̌bera si sie, ’Elia, mẹ̌kapu i kau sini?’ Elia simimbahẹ̌, ’Tau Israel tawe někoạ dianding i sire si Kau. I sire něndusa mezbah-Nu kụ němate manga nabi-Nu. Kụ ini, i sire lai mapulu měmate si siạ.’

Yehuwa nẹ̌bera si sie, ’Darisịe su rělahe.’ Bọu ene, anging maihạ timiụ. Tuhụe, piạ linuhẹ̌ dingangu putung. Bọu ene, Elia nakaringihẹ̌ tingihẹ̌ masikome. I sie něnutu ghatine dingangu pakeange kụ dimarisị su rělahu liang. Yehuwa nẹ̌kiwal᷊o kawe i sie timal᷊ang. Elia simimbahẹ̌, ’Orasẹ̌ ini, kětạeng iạ hala měnẹ̌němbah si Kau.’ Katewe Yehuwa naul᷊ị, ’I kau tawe sẹ̌sanu. Bědang piạ 7.000 tau Israel měnẹ̌němbah si Siạ. Dakọe tamai, kụ hengkẹ i Elisa makoạ nabi gunang měngganti si kau.’ Elia apidu natamai gunang měkoạ parentang i Yehuwa. Tumuhụ si kau, apa i Yehuwa lai sarung mẹ̌tul᷊ung si kau měkoạ kapulu-Ne? Iya, i sie sarung mẹ̌tul᷊ung. Bọete i kitẹ měmanda apa nariadi su tempong bědang piạ pědisẹ̌.