Jezabel rona buat neʼebé akontese ba Baal nia profeta sira, no neʼe halo nia hirus tebes. Nia haruka lia-menon ba Elias: ‘Aban, ó sei mate hanesan Baal nia profeta sira.’ Elias sai taʼuk tebes no halai ba rai-fuik maran. Nia halo orasaun: ‘Jeová, haʼu la tahan ona! Husik haʼu mate deʼit.’ Tuirmai, nia toba-dukur iha ai-hun okos tanba kole.

Anju ida fanu nia no koʼalia ho lian neineik: ‘Hadeer no han.’ Elias haree paun kabuar iha fatuk manas nia leten no bee buli ida. Nia han, hemu, depois toba fali. Anju neʼe fanu fali nia no dehan: ‘Han lai. Ó presiza forsa atu halo viajen.’ Entaun Elias han tan. Tuirmai nia halo viajen loron 40 no kalan 40, no toʼo iha Foho Horeb. Elias tama iha fatuk-kuak no toba. Maibé Jeová hatete ba nia: ‘Elias, ó halo saida iha neʼe?’ Elias hatán: ‘Ema Izraél kontra ona sira-nia promesa ba Ita-Boot. Sira harahun Ita-nia altár no oho Ita-nia profeta sira. Agora sira mós hakarak atu oho haʼu.’

Jeová hatete ba nia: ‘Sai bá no hamriik iha foho.’ Primeiru, anin huu makaʼas. Tuirmai, rai-nakdoko no ahi mosu. Ikusliu, Elias rona lian neineik no kalma. Nia falun ninia oin ho ninia roupa no hamriik iha fatuk-kuak nia liʼur. Jeová husu tanbasá nia halai. Elias hatán: ‘Agora, haʼu mesak deʼit mak adora Ita.’ Maibé Jeová dehan: ‘Ó la mesak deʼit. Sei iha ema naʼin-7.000 iha Izraél neʼebé adora haʼu. Bá no hili Eliseu atu sai profeta hodi troka ó.’ Elias bá kedas atu halo buat neʼebé Jeová haruka. Tuir ó-nia hanoin, Jeová mós sei ajuda ó ka lae se ó halo tuir ninia hakarak? Sin, nia sei ajuda. Agora mai ita haree saida mak akontese durante rai-hamlaha.