Nirey i Jezebela tie nimate iaby i mpaminany i Bala rey. Niboseke reke, le nagnirake ndaty hirehake amy i Elia tie: ‘Hovonoeko manahake i mpaminany rey ka rehe naho maray.’ Natahotse ty Elia, le nilay an-tane efetse agne. Nivavake reke tie: ‘Fa tsy tanteko zao Jehovah, aleoko mate.’ Niazon-droro tambane alokeo amy izay reke fa rokake.

Nisy anjely namoha aze sady nirehake moramora tie: ‘Mifohaza rehe le homàna.’ Nahita mofo boribory raike tambone ty vato mae teo, naho rano tagnate ty siny kede ty Elia. Nihinagne reke le niheren-droro. Nifohaze i anjelỳ indraike reke tie: ‘Homana fa mbe lavitse ty hombà’o.’ Nihinagne indraike ty Elia. Nandeha tomboke 40 andro naho 40 halegne reke vaho izay niavy tamy ty Vohitse Horeba agne. Nilitse tagnate lakato raike reke mba hiroro. Faie hoe ty Jehovah tama’e: ‘O Elia, ino atao’o atoio?’ Hoe ty Elia: ‘Nivalike tama’o o Israelitao, le rinava iareo ty alitara’o, sady nivonoe iareo ty mpaminani’o. Le mbe paliave iareo hovonoegne manahake izay ka raho.’

Hoe ty Jehovah tama’e: ‘Mitsangàna amy i vohitsey ey.’ Tamy ty voaloha’e nisy tiobey, le nisy ezegnezen-tane naho afo naho fa niavy eo. Naharey feo malemeleme amy izay ty Elia tafara izay. Nitakona’e tamy i akanjo’ey ty tarehe’e, le nitsangagne tambaly i lakatoy ao reke. Nagnontenea i Jehovah aze ty anto’e nilaisa’e. Hoe reke: ‘Izaho irery avao ty manompo azo!’ Hoe ty Jehovah: ‘Tsy ihe avao ty manompo ahy fa mbe misy Israelita 7 000 ka. Mandehana rehe, le tendreo ho mpaminany hisolo azo ty Elisa.’ Le avy le nandeha ty Elia. Mino vao rehe fa hagnampe azo ka ty Jehovah naho fa manao ty raha ampanoe’e rehe? Matokia fa hagnampe azo reke. Andao hey tika hagnente ty raha niseho tamy i hamain-taney.