Isevele wa yeva eci ca pita lovaprofeto va Baale kuenje wa temele calua. Eye wa tuma omunga yimue ku Eliya hati: ‘Hẽla, o pondiwa ndeci ovaprofeto va Baale va pondiwa.’ Eliya wa kuata usumba walua kuenje wa tilila vekalasoko. Eye wa likutilila hati: ‘A Yehova, si yongola vali oku kala lomuenyo. Njupe omuenyo wange.’ Lekavo lialua Eliya wa pekela vemi liuti umue.

Ungelo umue wo pasula kuenda locisola wo sapuila hati: ‘Pasuka kuenda lia.’ Eliya wa mola ombolo ya kala kilu liovawe a tokota kuenda esanga liovava. Kuenje wa lia, wa nyua kuenda wa pekela vali. Ungelo wo pasula onjanja yavali kuenda wo sapuila hati: ‘Lia. Ove o sukila oku kuata ongusu momo ungende wove walua.’ Kuenje Eliya wa lia. Noke wa linga ungende vokuenda kueci ci soka 40 kovotanya kuenda 40 kovoteke, toke eci a pitĩla Komunda Horeve. Komunda yaco, Eliya wa iñila veleva limue, oco a pekele. Pole, Yehova wa vangula laye. Eye wa popia hati: ‘Nye o kasi oku linga kulo, a Eliya?’ Eliya wa tambulula hati: ‘Va Isareli va yanduluka ocisila va linga love. Ovo va nyõla ovotala ove, kuenda va ponda ovaprofeto vove. Cilo va kasivo oku seteka oku ndi ponda.’

Yehova wa sapuila Eliya hati: ‘Kuende noke talama komunda.’ Tete ehunguhungu liofela lia pita keleva. Noke kua pita ocilemawe cimue kuenje kovaso yaco kueya ondalu. Oku sulako Eliya wa yeva okandaka kamue ka leñehako. Eliya wa sikĩlila ocipala caye lonanga kuenje wa talama kosamua yeleva. Yehova wo pula esunga lieci a tilila. Eliya hati: ‘Ame lika nda supapo.’ Yehova wo sapuila hati: ‘Ku kasi lika liove. Kuli eci ci soka 7.000 via va Isareli, vana okuti handi va kasi oku ndi fendela. Kuende, nõla Elisia oco a kale uprofeto okuti oku piñala.’ Vepuluvi liaco, Eliya wa enda oku linga eci Yehova o tuma. O sima hẽ okuti Yehova o ku kuatisavo nda o linga ovina eye a yongola? Ocili okuti o ku kuatisa. Tu kũlĩhĩsi ovina vimue via pita vokuenda kuotembo yocitenya.