Isebele o pfa nga zwe zwa itea kha vhaporofita vha Baali, nahone a sinyuwa nga maanḓa. A rumela mulaedza kha Elia a ri: ‘Matshelo ni ḓo fa u fana na vhaporofita vha Baali.’ Elia a ofha vhukuma nahone a shavhela sogani. A rabela a ri: ‘Yehova, thi tsha kona u konḓelela. Ntendele ndi fe.’ Nga ṅwambo wa u neta, Elia a farwa nga khofhe fhasi ha muri.

Muruṅwa a mu vusa nahone a amba nae zwavhuḓi a ri: ’Vuwani ni ḽe.’ Elia a vhona vhurotho ha raundu kha matombo ane a khou fhisa na dzhege ya maḓi. A ḽa na u nwa nahone a dovha a eḓela. Muruṅwa a dovha a mu vusa nahone a ri: ‘Iḽani. Ni tea u wana maanḓa u itela u fara lwendo.’ Nga zwenezwo Elia a dovha a ḽa. O tshimbila maḓuvha a 40 na vhusiku ha 40, a vhuya a swika Thavhani ya Horebe. Henefho Elia a dzhena bakoni a eḓela. Fhedzi Yehova a amba nae. A ri: ‘Ni khou ita mini afha, Elia?’ Elia a fhindula a ri: ‘Vhaisiraele a vho ngo ita zwe vha u fulufhedzisa. Vho kwasha aletare dzau nahone vha vhulaha vhaporofita vhau. Zwino vha khou lingedza u mbulaha.’

Yehova a mu vhudza a ri: ‘Gonyani ni yo ima thavhani.’ Ha thoma u vha na ḓumbu ḽihulwane ḽe ḽa vhudzula ḽi tshi fhira bakoni. Ha tevhela mudzinginyo na mulilo. Mafheleloni, Elia a pfa ipfi ḽo dzikaho, ḽi re fhasi. A thivha tshifhaṱuwo tshawe nga tshiambaro nahone a ima nnḓa ha bako. Yehova a mu vhudzisa uri ndi ngani o shavha. Elia a ri: ‘Ndi nṋe ndi ndoṱhe ndo salaho.’ Fhedzi Yehova a mu vhudza a ri: ‘A ni noṱhe. Hu na vhathu vha 7,000 kha ḽa Isiraele vhane vha kha ḓi rabela nṋe. Tshimbilani ni yo vhea Elisa a vhe ene muporofita vhudzuloni haṋu.’ Nga u ṱavhanya, Elia a ya a ita zwe Yehova a mu vhudza zwone. Ndi humbula uri na inwi Yehova a nga ni thusa arali ni tshi ita zwine a zwi ṱoḓa? Ee, u ḓo ni thusa. Kha ri sedze tshiṅwe tshithu tshe tsha itea misini ya gomelelo.