Hinbatian ni Jesebel an nahitabo ha mga propeta ni Baal, ngan nasina gud hiya. Nagpadara hiya hin mensahe kan Elias: ‘Buwas, mamamatay ka pariho han mga propeta ni Baal.’ Nahadlok hinduro hi Elias salit pinalagiw hiya ngadto ha disyerto. Nag-ampo hiya: ‘Jehova, diri ko na kaya. Karuyag ko na mamatay.’ Tungod ha kakapoy, nahingaturog hiya ilarom han usa nga kahoy.

May anghel nga nagpukaw ha iya ngan malumo nga nagsiring: ‘Buhat, kaon.’ Nakita ni Elias an usa nga lidong nga tinapay ha bawbaw han ginpaso nga mga bato ngan an usa ka tibod nga tubig. Kumaon hiya ngan uminom ngan bumalik pagkaturog. Ginpukaw utro hiya han anghel ngan siniring: ‘Kaon. Kinahanglan mo hin kusog para ha imo biyahe.’ Salit kinaon pa hi Elias. Katapos, nagbaktas hiya hin 40 ka adlaw ngan 40 ka gab-i tubtob nga nakaabot hiya ha Bukid Horeb. Didto, sinulod hiya ha usa nga lungib basi kumaturog. Pero ginkaistorya hiya ni Jehova. Hi Jehova nagsiring: ‘Nag-aano ka dinhi, Elias?’ Hi Elias binaton: ‘Waray tumana han mga Israelita an ira saad ha imo. Ginbungkag nira an imo mga halaran ngan ginpamatay an imo mga propeta. Yana, karuyag liwat nira ako patayon.’

Ginsidngan hiya ni Jehova: ‘Gawas ngan tindog ha bukid.’ Ha siyahan, may linabay ha lungib nga makusog gud nga hangin. Sunod, lininog. Kahuman, nagkaada kalayo. Tapos, nakabati hi Elias hin kalmado ngan mahinay nga tingog. Gintabonan niya an iya nawong han iya bado ngan tinindog ha gawas han lungib. Kahuman, ginpakianhan hiya ni Jehova kon kay ano nga pinalagiw hiya. Hi Elias nagsiring: ‘Ako na la an nabilin.’ Pero ginsidngan hiya ni Jehova: ‘Diri ka nag-uusahan. May 7,000 pa ha Israel nga nagsisingba ha akon. Lakat ngan dihugi hi Eliseo basi magin propeta nga kasaliwan mo.’ Ginbuhat dayon ni Elias an ginsiring ni Jehova. Pagkita mo, bubuligan ka ba liwat ni Jehova kon buhaton mo an iya karuyag? Oo, bubuligan ka niya. Pag-istoryahan naton an usa nga panhitabo durante han huraw.