I kind nindo ma ceng’ ubino rieny i ie, Yehova uwacu ni Eliya kumae: ‘Cidh i Zarefath. Dhaku moko ma cware tho ni kuca. Ebiwok mio iri kwen.’ Kinde m’Eliya uwok i dhugang’ mir adhura mi Zarefath, eneno dhaku moko ma cware tho ubemwodo yen. Eliya ukwayu pii m’amadha i bang’e. Kinde m’ecoko woth pi nicigamu pige, Eliya lwong’o toke, man ewacu ire kumae: ‘Akweyi, mii kwen moko acam.’ Ento dhakune dwoko ire kumae: ‘Kwen m’aromo mio iri mbe. Atie ku mogo man mo moko nyanok kende m’atedo ko cam iwa waku woda.’ Eliya uwacu ire kumae: ‘Yehova ung’olo nia tek ibimio cam ira, mogo bithum ungo kud i agulu peri man mo peri de bithum ungo nitundo koth bidwogo.’

E dhakune cidho i ot pare man etedo cam ni jabila pa Yehova. Calu ma Yehova ung’olo, cam pa dhaku maeno giku wode uthum ungo i kind oro ma ceng’ ubino rieny i ie zoo. Mogo uthum ungo kud i agulu pare man mo de uthum ungo.

 I ng’eye, lembe moko mi can utimere. Remo umaku wod dhaku maeno man etho. Dhakune kwayu nia Eliya ukonye. Eliya uting’o wod dhakune i kore man eidho kude malu i kusika kaka m’ebed evuto i ie. Ewok epiele iwi kavuto, man erwo i bang’ Yehova kumae: ‘E Yehova, akweyi, keth kwo pa nyathin maeni udwog kendo i ie.’ E kwo pa nyathin ne udwogo, man ecaku yuyo. Ebino udu ma dit, pilembe nwang’u fodi ng’atu moko mbe m’ucer. Dhaku maeno giku wode ceke gibino Juisrael ungo.

Eliya ugam uyero ni dhakune kumae: ‘Nen! Wodi cer.’ Anyong’a nege magwei, man ewacu ni Eliya kumae: ‘Ang’eyo nia itie dhanu pa Mungu andha. Pilembe iyero kwa lembe m’uai i bang’ Yehova, man lembene ceke timere kubang’e kubang’e.’