Jallojj jan purkäna uka tiemponjja, Jehová Diosajj Eliasar akham sänwa: ‘Sarepta markar saram. Ukanwa mä viuda warmejj manqʼa churätam’ sasa. Uka markar mantañawjanwa mä viuda warmejj phayañatak lawanak pallasiskäna, Eliasajj ‘umay wajjtʼita’ sasaw jupar säna. Um aptir saraskäna ukhajja, Eliasajj akham sarakïnwa: ‘Mirä amp suma, mä jiskʼa tʼantʼampiy wajjtʼita’ sasa. Viuda warmisti sänwa: ‘Janiw tʼantʼajj utjkituti, janiw kuna manqʼas utjkituti. Mä jukʼa jakʼumpi mä jukʼa aceitempikiw utjitu, ukakwa wawajampitak nayampitak phayasëjja’ sasa. Eliasasti sarakïnwa: ‘Jehová Diosan aruparjamajja, mä jiskʼa tʼantʼa wajjtʼitäta ukhajja waña tiempo tukusiñapkamaw jakʼumasa aceitemasa utjaskakini’ sasa.

Viuda warmejj utapar sarasaw Jehová Diosan profetapatakejj tʼantʼa luräna. Kunjamtï Diosajj siskänjja, ukhamapuniw waña maranakan viuda warmitakis wawapatakis manqʼajj jan pistʼkänti. Wakullapanjja janiw jakʼojj tukuskänti, aceitepas janirakiw tukuskänti.

Qhepatjja mä jachʼa llakiw pasäna. Viuda warmin wawapaw wal usuntasin jiwjjäna. Ukatwa Eliasarojj ‘yanaptʼakitaya’  sasin ruwtʼasïna. Eliasajj mamapat wawa mayisajj altus utaruw ichkatäna. Ukatsti ikiñar iktʼayasaw akham sasin orasïna: ‘Jehová Dios Tata, mirä amp suma, aka wawarojj jaktayakimaya’ sasa. ¿Diosajj jaktayänti? ¿Kunatsa ukajj wali musparkañänjja? Uka tiempokamajj janipuniw khitis jiwatat jaktirïkänti. Uka viuda warmisa wawapasa janirakiw israelitäpkänti.

Wawajj samsjjänwa, jaktjjarakïnwa. Eliasajj viuda warmir akham sänwa: ‘¡Uñjam, wawamajj jakaskiwa!’ sasa. Uka warmejj wali kusisitaw Eliasar säna: ‘Jichhaw yatta, jumajj Diosan serviripäskapuntawa. Arsutamajj Jehová Diosatwa juti, ukatwa phoqasipuni’ sasa.