Tingki masa dope ari logo i, didok Jahowa ma tu si Elia, ‘Laho ma ho tu Sarpat. Adong do disi sahalak ina na mabalu na mangalehon ho mangan.’ Di gerbang ni kota i, diida si Elia ma sahalak ina na mabalu papunguhon soban. Dipangido ma aek tu borua i. Dung dilehon aek i, didok si Elia ma, ‘Lehon ma jo di ahu roti.’ Alai didok ina na mabalu i ma, ‘Ndang adong rotingku. Holan saotik nama topung dohot miaknami. I pe laho di ahu dohot di anakku do i.’ Didok si Elia ma, ‘Nunga marjanji Jahowa, molo dibahen ho di ahu roti, ndang marnasuda topung dohot miakmi sahat tu na ro udan.’

Alani i, laho ma ina na mabalu i tu jabuna jala dibahen ma roti di si Elia. Songon janji ni Jahowa, sai adong do sipanganon ni nasida saleleng ari logo. Ndang marnasuda topung dohot miakna i.

 Alai ndang sadai leleng, marsahit ma anak ni ina na mabalu i, dung i mate. Dipangido ina na mabalu i do asa diurupi si Elia ibana. Diabing si Elia ma anakna i, jala diboan tu loteng. Dipeakkon ma dakdanak i di podoman, jala martangiang ma si Elia. Didok ma, ‘Ale Jahowa, pangolu ma muse dakdanak on.’ Molo dipangolu Jahowa dakdanak i, tontu longang do hita kan? Boasa? Alana di tingki i, ndang adong dope halak na mangolu muse dung mate. Jala ina na mabalu dohot anakna i pe ndang halak Israel.

Alai mangolu do muse dakdanak i! Didok si Elia ma tu ina na mabalu i, ‘Ida ma! Nunga mangolu muse anakmi.’ Mansai las ma rohana, jala didok ma tu si Elia, ‘Tutu do ho na sinuru ni Debata. Huboto ma, sian Jahowa do sude na nidokmi.’