Ro fafisu dares iba, Yahwe ikofen ḇe Elia, ’Rwa ḇe Zarefat. Ro diwa nari kabom oso ḇyuk roḇean ḇe au.’ Ro kerwa ḇeba mnu ani, Elia myam kabom ḇesabarar oso isya iryur aimun na. Elia dor war ro i fa dinem. Fyor kabom ani rya fa dun ware, Elia dori ma ikofen, ’Wun pyan mamami ḇe aya.’ Ḇape, kabom ani doḇe, ’Yasmai mamami oḇa. Yana tepung ma mani kermkun monda fa yafrur na ḇe roḇean faro aya ma romawa yedi.’ Elia doḇo, ’Yahwe ḇyeasas fyor wafrur mamami ḇe aya ido, tepung ma mani bena napok nabro ḇa isof ro mekem ya dado wer.’

Inja, kabom ani ibur ma ifrur mamami faro Yahwe nabi ḇyedine. Imnis Yahwe ḇyeasas kwar, kabom ani ma romawa ḇyedi roḇean suḇena napok nabro ḇa ro fafisu dares iba anya. Tepung ma mani ḇero babewu suḇena naisya pdef.

 Ramnai, roi ḇeḇyeḇa nkur kabom ani. Romawa ḇyedi iduf marḇak rawo imar. Dor fafnoḇek ro Elia i. Elia dun romawa ani ro snari ma ikanow i ḇe sim ḇero boya ro kabom ani rum ḇyeja. Elia ḇye i fa ḇyarek ro roi sḇukidenef ma ḇyenadi, ’Yahwe yo, ḇe romawa ine fa ikenem kaḇer kada.’ Wafawi ke, rosai ḇefnai fa inema roi ḇepyum kaku Yahwe ifrur ya? Snaro isof fafisu anya, snonkaku osoḇa imar ḇo ikenem kaḇer. Osower ido, kabom ani ma romawa ḇyedi suma snonkaku Israel suisyaḇa.

Romawa ani ikenem kaḇer ma iyer knaref wer! Elia ikofen ḇe kabom ani, ’Mame! Roma bedi ikenem.’ Imarisen kaku ma ikofen ḇe Elia, ’Auma Allah manfamyan ḇekaku ḇyedirya. Yafawi snar wakofen rosai Yahwe ikofenḇair ḇe au na, ma nakam ndarirya kaku.’