Éyoñe ya ésep, Yéhôva a nga jô Élie na: ‘Kele’e Sarepta (Tsarphath). Nkuse minga éziñ ô ne wôé wo ye ve wo bidi.’ Éyoñ a nga kui mbé akak, Élie a nga yene nzôzoé minga éziñ ô kôane bidi. Nde a nga ja’é nye ékpwas mendim. Nté a mbe a kele’e nye nyoñe mendime ya nyu, Élie a nga jô nye na: ‘Éngôngo, za’a fe ma éfuse belet.’ Ve nkuse minga ôte ô nga jô nye na: ‘Me nji bi atañ belet ya ve wo. Me bili ve mon avut, a mone mbone ma ye yam asu bia mone wom.’ Ane Élie a nga jô nye na: ‘Nge ô yame ma belet, Yéhôva a ye bo na avute dôé a mbone wôé bi bo te man akekui mveñ ja ye noñ.’

Ane minga ate a nga ke yame Élie bidi. Fo’o ve avale Yéhôva a nga ka’ale, minga ate ba mone wôé be nga bi jôme ya di nté ôse ésep é mbe. Vie’e avut ô nji sé’an, a nde’e bon é nji man.

Ve mbia jam a nga kui. Mone nkuse minga ôte a nga kon, a su’ulane fe wu. Nde minga ate a nga sili Élie mvolan. Ane Élie a  nga be’e mongô tôé, a kele nye étun nda. Nde a nga boé nye énoñ, a ye’elane Yéhôva na: ‘Éngôngol a Yéhôva, wômôlô’ô mongô nyi.’ Ye wo yem amu jé jam Élie a nga sili Yéhôva e mbe étua jam? Amu avale bia yem, teke môt éziñ a mbe a wômôya miñwuan. Nde fe, minga ate ba mone wôé be nji be bôte ya ayoñ Israël.

Ve Yéhôva a nga wômôlô mongô ate, a taté na a vebe. Élie a nga jô nkuse minga na: ‘Tame yen! Mone wôé a wômôya.’ Mevak ve zu jaé minga nlem, ane a nga jô Élie na: ‘Ô ne fo’o môte Zambe. Ma yeme nalé amu wo kobô ve mame Yéhôva a kate wo.’