Ha mashimbu a changa Yehova yalweza Eliya ngwenyi: ‘Yako ku Zarafata.Umwe tuliwa watwamako makwaha kulia.’ Muze Eliya ahetele ku yikolo ya mbonge, yamona pwo tuliwa chiswale kanachaye kunyi. Iye yamwita meya akunwa. Muze te anayi ni kwanda meya, Eliya yamulweza nawa ngwenyi: ‘Lisesa ngunehene kama umwe lumbolo.’ Alioze tuliwa yamba ngwenyi: ‘Kungushi ni mbolo yize mungukwaha. Nguli wika ni unga ni maji hanga ngulinge lumbolo wa yami ni mwanami.’ Eliya yamwamba ngwenyi: ‘Yehova kanalakenya ngwenyi, nyi mungwaha umwe lumbolo, unga we ni maji je kuyichi kuhwa ndo tangwa lize vula muyikanoka nawa.’

Chocho tuliwa yanjila mu zuwo yochela profeta wa Yehova lumbolo. Ngwe chize Yehova alakenyene, tuliwa ni mwanenyi nihindu kapwile ni kulia ha mashimbu eswe a changa. Milondo yo ya unga ni maji yanungine ya kuzala.

 Hachino, chimwe chuma chipi yichilingiwa. Mwana wa tuliwa, yaputuka kuyiza chocho yafwa. Iye yeta kuli Eliya hanga amukwase. Eliya yanda mwana wacho yaya nenyi mu chipatulo cheka. Iye yamupombesa ha muhela ni kulemba ngwenyi: ‘Yehova lisesa hindwisa kama yono mwana.’ Shina unanyingika mumu liaka chapwile kukomoka ha yize Yehova alingile? Ngwe chize tunanyingika, ha mashimbu jacho te kanda achihindwisa kama mutu niumwe ku ufwe. Nawa tuliwa wacho ni mwanenyi te hi A-Izalele ko.

Alioze mwana wacho yahinduka mu ufwe! Eliya yalweza tuliwa ngwenyi: ‘Tala! Mwane hahinduka.’ Iye yawahilila chinji ni kulweza Eliya ngwenyi: ‘Pundu lume yena uli mutu wa Zambi. Nanyingika chino, mumu yena wakuhanjika wika yize Yehova akukulweza hanga uhanjike.’