Be ni nu hɔmɔ lɛ ba lɛ, Yehowa kɛɛ Elia akɛ: ‘Yaa Zarefat. Yoo okulafo ko baahã bo niyenii.’ Be ni Elia shɛ maŋ lɛ geeti lɛ naa lɛ, ena yoo okulafo ohiafo ko ni eebua lai naa. Ebi yoo lɛ ni ehã lɛ nu kɔɔpoo kome. Be ni yoo lɛ yaa lɛ, Elia kɛɛ lɛ akɛ: ‘Ofainɛ, baahã mi blodo fioo.’ Shi yoo lɛ kɛɛ lɛ akɛ: ‘Mibɛ blodo ni manyɛ mahã bo eko. Nɔ pɛ ni miyɔɔ ji ashikishaŋ fioo kɛ fɔ fioo ni mikɛbaafee niyenii fioo mahã mi kɛ mibinuu lɛ.’ Elia kɛɛ lɛ akɛ: ‘Yehowa ewo shi akɛ, kɛ́ ofee blodo lɛ obahã mi lɛ, ashikishaŋ lɛ kɛ fɔ lɛ etaŋ kɛyashi nugbɔ baabɔi nɛmɔ ekoŋŋ.’

No hewɔ lɛ, okulafo lɛ tee shĩa ni eyafee blodo lɛ ebahã Yehowa gbalɔ lɛ. Yehowa hu ye eshiwoo lɛ nɔ. Yoo okulafo lɛ kɛ ebinuu lɛ ná niyenii amɛye kɛyashi nugbɔ bɔi nɛmɔ ekoŋŋ. Ashikishaŋ lɛ kɛ fɔ lɛ etãaa.

Shi mɔbɔ sane ji akɛ, hela bamɔ yoo okulafo lɛ binuu lɛ waa ni egbo. Ekpa Elia fai ni efee nɔ ko yɛ sane lɛ he. Elia he gbekɛ lɛ  yɛ edɛŋ ni ekɛ lɛ tee tsũ ko mli yɛ ŋwɛitsu lɛ nɔ. Ekɛ gbekɛ lɛ yafɔ̃ saatso ko nɔ ni esɔle ekɛɛ Yehowa akɛ: ‘Yehowa, ofainɛ hã gbekɛ nɛɛ aba wala mli ekoŋŋ.’ Enɛ baafee nɔ ko ni yɔɔ naakpɛɛ waa, ejaakɛ wɔleee mɔ ko ni gbo dani gbekɛ nuu nɛɛ gbo ni atee lɛ shi. Kɛfata he lɛ, yoo okulafo nɛɛ kɛ ebi lɛ fɛɛ jeee Israelbii.

Shi Yehowa bo Elia toi. Ehã gbekɛ lɛ ba wala mli ekoŋŋ ni ebɔi muu! Elia kɛɛ okulafo lɛ akɛ: ‘Kwɛmɔ! Obinuu lɛ yɛ wala mli.’ Yoo lɛ ná miishɛɛ waa, ni ekɛɛ Elia akɛ: ‘Nyɔŋmɔ gbɔmɔ ji bo lɛɛlɛŋ. Ejaakɛ nɔ ni Yehowa kɛɔ bo akɛ owie lɛ, no pɛ owieɔ.’