N tain te mwautakataka ao e tuanga Eria Iehova ni kangai: ‘Naako Tarebata. Ane e na karerekea kanam te aine ae e a tia ni mate buuna.’ Ao Eria e nora te aine ae e a tia ni mate buuna ae maiu ni kainnano ni mataroan oon te kaawa ae e tabe n tabeaia. E bubutiia bwa e na anganna te mwangko n ran. Ngke e nako neiei ni karekea, ao e takarua Eria ni kangai: “Taiaoka ma ko a uotaamai naba te mwakorona te kariki.” Ma e taku neiei: ‘Akea au kariki ae N na anganiko. E bon tii tau te burawa ao te oera ibukin te amwarake ae uarereke ibukiu ma natiu te mwaane.’ E taku Eria nakon neiei: ‘E berita Iehova bwa ngkana ko karaoa te kariki teutana ibukiu, e na aki bane am burawa ao te oera ni karokoa ae e a manga bwaka te karau.’

Ngaia are e a nako neiei nakon ana auti ao e karaoa te kariki ibukin ana burabeti Iehova. N aron are e beritanna Iehova, e a bon rereke naba kanan te aine aei ma natina n tain te mwautakataka. E aki roko n te bane te burawa ao te oera man te kaatibu.

 Imwina e a riki te bwai ae kananokawaki. E a kakaiaki aorakin natin te aine aei ao e a mate. E bubutiia Eria neiei bwa e na buokia. E anaa te teinimwaane Eria mai bain tinana ao e uotia nakon te ruu are i eta. E kawenea n te kainiwene ao e tataro ni kangai: ‘Iehova, taiaoka kaoka maiun te ataei aei.’ Ko ataia bwa e aera ngkai e kamimi ngkana e karaoa anne Iehova? Ibukina bwa n aron ae ti ataia, akea ae e a tia ni kautaki man te mate. Ao tiaki naba tibun Iteraera te aine ae e a tia ni mate buuna aei ma natina.

Ma e a manga maiu te teinimwaane aei ao e a ikeike! E taku Eria nakon te aine aei: “Noria, e a maiu natim.” E rangi ni kimwareirei neiei ao e taku nakon Eria: ‘Bon ana aomata te Atua ngkoe. I ataa aei ibukina bwa ko tii taekina te bwai ae e tuangko Iehova.’