I dere Ziit, wos nid gregnet het, schickt Jehova de Elia los und seit: «Gang uf Zarephath. Dört wird dir e Witwe z Esse gee.» Wo de Elia zu dere Stadt chunnt, gseht er e armi Witwe, wo am Holz Zämesammle isch. Er fragt si, öb si ihm e chli Wasser heg. Wo si s Wasser wett go hole, rüeft er no hindenache: «Bring mir bitte au no es Stück Brot mit.» Da seit si zu ihm: «Ich ha keis Brot für dich. Das bizeli Mehl und Öl, wo ich no ha, längt chuum no für mich und min Sohn.» Da seit de Elia: «Wenn du mir es Brot bachsch, denn wird din Ölchrueg und de Chrueg, wo s Mehl dine isch, nie leer sii, bis es wider chunnt cho regne. Das het Jehova versproche.»

Denn gaht d Witwe hei und bachet für de Prophet Elia es Brot. Und denn chunnts genau eso, wies Jehova versproche het: Ihre Mehlchrueg und ihre Ölchrueg werded nie leer. Und si und ihre Sohn hend i dere Ziit, wos nid regnet, immer gnueg z Esse.

Aber nachher passiert öppis ganz Schlimms. De chlii Sohn vo de Witwe wird eso chrank, dass er stirbt. Sini Muetter isch ganz verzwiiflet und gaht zum Elia. De Elia nimmt de Bueb us ihrne Arme und treit ihn ufe in es Zimmer. Dört leit er ihn uf es Bett und betet: «Bitte Jehova, mach, dass de Bueb wider lebt.» Weisch du werum das Gebet zu Jehova eso speziell gsi isch? Wil bis denn sehr wahrschiinlich no nie en Tote wider lebig worde isch. Und die Witwe und ihre Sohn sind ja nid emal Israelite.

Aber de Bueb wird tatsächlich wider lebig und fangt a schnuufe! De Elia seit zu de Witwe: «Lueg! Din Sohn lebt!» Si isch überglücklich und seit zum Elia: «Gott isch würklich mit dir. Jetzt bin ich mir sicher, wenn du öppis seisch, chunnt das vo Jehova und wird immer wahr.»