Anuu nünüiki Jeʼwaa nümüin Elías soʼu alin maʼin miyaasü chaa Israel: «Puʼuna chamüin Sareptamüin. Eejeerü püpüla wanee wayuu outa aʼwayuuset, shikireechi pia». Mamüin aka türa soʼuluʼu tü pueulokot, niʼrüin Elías wanee wayuu outa aʼwayuuset sünain akotchojoo siki. «Tasa maa wüin», nümaka Elías sümüin. Süsaajaka wüin nüsüin. «Jalia maa taya, pikira taya shiʼipachon pan», nümaka Elías. «Nnojotsü pan tamaʼana, aisü jamü. Shia neʼe eeka tamaʼana palitchon ariina jee seita süpüla taʼlakajaain teküin nümaa tachon», sümaka nümüin. Nusoutaka sümüin: «Nüküjain tamüin Jeʼwaa sünain eejeerüin seita waneepia pümaʼana otta ariina waneʼereʼeya shiʼitapa juyakat. Meerü tia müleka paainjale wanee joʼuuchon pan teküin».

Suʼunaka tü wayuu outa aʼwayuusetkat shipialuʼumüin sünain aʼlakajawaa pan niyaaluʼu chi nünüikimaajachikai Jeʼwaa. Ekeraajüsü tü nümakat Jeʼwaa, eesü waneepia eküülü sümaʼana tü wayuu outa aʼwayuusetkat nümaa chi süchonchonkai. Nnojotsü ajaʼttüin tü seitakat suluʼu tü jaarü joʼuuchonkat otta tü ariina suluʼukat tü jaarü miyoʼukat.

 Alatüsü wanee kasa mojusü mapa. Ayuuijaashi süchon tü wayuukot jee outaka nia. Tü wayuu outa aʼwayuusetkat suchuntuin maʼin nümüin Elías süpüla nükaaliinjain shia. Nüpataaka Elías chi jintüikai, nülüʼüjaka nia nutunkuleruʼu. «Jeʼwaakalee kata noʼu putuma nüchikuaʼa chi jintüikai», nümaka Elías. ¿Jamüsü ponoko maʼin saaʼin wayuu tü naaʼinrakat Jeʼwaa? Shia süka nnojoluin eeichin wanee wayuu katakai oʼu nüchikuaʼa süchikijee outuin nia. Jee müsia süka nnojoluin israeliitain tü wayuu outa aʼwayuusetkat nümaa chi süchonkai.

Kataka noʼu nüchikuaʼa chi jintüikai. «Anii chi püchonkai, katüsü noʼu nüchikuaʼa», nümaka Elías sümüin tü wayuukot. Talatüsü maʼin saaʼin tia wayuukot. «Tatüjaaitpa aaʼu shiimain nünüikimaajachin pia Maleiwa. Tü pümakat nümaʼanajeejatü shia Jeʼwaa, süka jamüin, shikeraajüin waneepia», sümaka tü wayuukot nümüin Elías.