Tji kwa ri ourumbu Jehova wa raera Elia na tja: ‘Twende koSarepta. Omukazendu omuhepundu ngu ri ngo me ke kupa ovikurya.’ Elia tje ya pomuvero wotjihuro wa vaza po omukazendu omuhepundu ngu ma tyora ozonguṋe. Eye we mu ningira omeva. Nu omukazendu tja ya okukapaha omeva, Elia we mu isana na tja: ‘Arikana, ndji etera omboroto.’ Posiya omukazendu omuhepundu wa tja ku ye: ‘Ami hi nomboroto okukupa. Mbi noruhere rwozomboroto oruṱiṱi uriri nomaze wokuzika ovikurya oviṱiṱi uriri ku ami nokazandona kandje.’ Elia we mu raera kutja, ‘Jehova wa kwizika kutja tji we ndji ungurire omboroto, oruhere rwoye nomaze woye kamaaye yanda ko, nga ombura tji ya roko rukwao.’

Okutja omukazendu omuhepundu wa ya koye na kaungurira omuprofete waJehova omboroto. Otja Jehova pa kwizika, omukazendu ngwi nokazandona ke aruhe va ri novikurya okurya moruveze rwourumbu. Ovipwikiro vyawo aruhe vye urire novikurya.

Okuzambo pa tjitwa otjiṋa tjarwe otjihihamise. Okazandona komuhepundu nga, ka vera na rire tjika ṱu. Eye we riheka ku Elia kutja  me mu vatere. Elia wa toora okazandona mekoro re na twara ketuwo rokombanda mondjuwo yomuhepundu. We mu rarisa kombete na rire tja kumbu a tja: ‘Jehova, arikana kotora omuatje ngwi komuinyo.’ Mo tjiwa kutja ongwaye ihi tjatja tji rira otjiṋa otjihimise Jehova okutjita? Orondu okuza kombutiro nga keyuva ndo kape nomundu ngwa rora okupendurwa komuinyo. Nu omukazendu omuhepundu ngwi nokazandona ke kava ri Ovaisrael.

Posiya okazandona nga ka hara omuinyo rukwao nake utu okusuvana! Elia wa raera omukazendu omuhepundu na tja: ‘Tara! Okazandona koye ka hara omuinyo rukwao.’ Omukazendu omuhepundu ngwi wa yoroka tjinene na tja ku Elia: ‘Oove omukarere wa Mukuru tjiri. Me tjiwa otjiṋa hi orondu ove u hungira imbi Jehova mbi me ku raere okuhungira.’