Saʼ xqʼehil li chaqiʼe, li Jehobʼa kixye re laj Elias: «Ayu saʼ li tenamit Sarepta. Aran wank jun li malkaʼan li tixkʼe aatzakahemq». Saʼ rokebʼaal li tenamit, laj Elias kiril jun li malkaʼan nebʼaʼ li yook xxokbʼal xsiʼ ut kixpatzʼ bʼayaq xhaʼ. Naq li ixq xkoho xkʼambʼal chaq li haʼ, laj Elias kixye re: «Bʼaanu usilal, taakʼe ajwiʼ bʼayaq inwa». Abʼan li malkaʼan kixye re: «Maakʼaʼ inwa, maakʼaʼ naru tinkʼe aawe. Kaʼajwiʼ wank insaqikʼaj ut aseeyt re xyiibʼankil bʼayaq xwa linyum ut we laaʼin». Laj Elias kixye re: «Li Jehobʼa kixye chaq naq, wi taayiibʼ bʼayaq inwa, inkʼaʼ t-osoʼq laaʼaseeyt ut laasaqikʼaj chiruhebʼ li kutan li twanq wiʼ li chaqiʼe».

Joʼkan naq li malkaʼan xkoho saʼ rochoch ut kixyiibʼ xwa li xpropeet li Jehobʼa. Li malkaʼan ut li xyum keʼwank xtzakahemq chiruhebʼ li kutan li kiwank wiʼ li chaqiʼe, joʼ kixye chaq li Jehobʼa. Li saqikʼaj ut li aseeyt maajunwa kiʼosoʼk.

 Chirix chik aʼan kikʼulmank jun li rahil chʼoolejil. Li xchʼina yum li malkaʼan kinimank xyajel ut kikamk, ut kixtzʼaama re laj Elias naq ttenqʼaaq. Tojaʼ naq laj Elias kixchap li chʼinaʼal saʼ ruqʼ li xnaʼ. Kixkʼam saʼ li xkabʼ kʼojar li ochoch. Chirix chik aʼan, kixkʼe li chʼinaʼal saʼ jun li chʼaat ut kitijok: «At Jehobʼa, bʼaanu usilal, kʼe wiʼ chik xyuʼam li chʼinaʼal aʼin». Ma nakaanaw kʼaʼut jwal chaabʼil raj naq li Jehobʼa tixbʼaanu aʼin? Xbʼaan naq chiruhebʼ li kutan aʼan, maajun rehebʼ li kamenaq ak xwakliik chi yoʼyo. Ut xbʼaan naq li malkaʼan ut li xyum maawaʼebʼ aj Israel.

Tojaʼ naq li chʼinaʼal kiʼok chi musiqʼank ut xwank wiʼ chik xyuʼam. Laj Elias kixye re li malkaʼan: «Il, laayum yoʼyo». Li malkaʼan jwal kisahoʼk saʼ xchʼool ut kixye re laj Elias: «Anaqwan ninnaw tzʼaqal naq li Yos kitaqlank chaq aawe. Li nakaaye chalenaq rikʼin li Jehobʼa, joʼkan naq junelik natzʼaqlok ru».