Hĩndĩ ĩrĩa kwarĩ na ng’aragu, Jehova nĩ eerire Elija ũũ: ‘Thiĩ Zarefathu na nĩ ũkũheo irio nĩ mũtumia ũmwe wa ndigwa.’ Elija akinya kĩhingo-inĩ gĩa itũũra rĩu, nĩ onire mũtumia wa ndigwa warĩ mũthĩni akĩũngania ngũ, na akĩmũhoya maĩ ma kũnyua. Rĩrĩa mũtumia ũcio aathiaga kũgĩra maĩ, Elija nĩ aamwĩtire na akĩmwĩra ũũ: ‘Ndagũthaitha ũndehere kenyũ ka mũgate.’ Nake mũtumia ũcio akĩmwĩra: ‘Ndirĩ na kamũgate ingĩkũhe. Ndĩ o na kamũtu kanini na tũguta tũnini twa kũruga irio citũ na mwana wakwa.’ Elija aamwĩrire: ‘Jehova oigĩte atĩ angĩkorũo nĩ ũkũndugĩra mũgate, mũtu waku na maguta gũtirĩ hĩndĩ igaathira o nginya rĩrĩa mbura ĩkoira.’

Nĩ ũndũ ũcio mũtumia ũcio nĩ aathiire na akĩrugĩra Elija mũgate. O ta ũrĩa Jehova oigĩte, gũtirĩ hĩndĩ mũtumia ũcio marĩ na mwana wake maagire irio ihinda rĩu kwarĩ ng’aragu. Ndigithũ ciake cia mũtu na maguta ciatũũraga ciyũire.

 Thutha ũcio nĩ gwacokire gũgĩkĩka ũndũ mũru. Kahĩĩ ka mũtumia ũcio wa ndigwa nĩ kaarũarire mũno na gagĩcoka gagĩkua. Nĩ aathaithire Elija amũteithie. Elija oire kahĩĩ kau na agĩgakuua agĩgatwara rumu yarĩ ngoroba-inĩ thĩinĩ wa nyũmba ĩyo. Aagakomirie ũrĩrĩ-inĩ na akĩhoya ũũ: ‘Jehova, ndagũthaitha ũcokie kaana gaka muoyo.’ Hihi nĩ ũĩ nĩkĩ gũcokia mwana ũcio muoyo kũngĩarĩ ũndũ wa kũgegania? Nĩ tondũ gũtiarĩ na mũndũ ũngĩ wacoketio muoyo mbere ĩyo. Ũndũ ũngĩ nĩ atĩ, mũtumia ũcio na mwana wake matiarĩ Aisiraeli.

Kahĩĩ kau nĩ kaariũkirio na gakĩambĩrĩria kũhuhia. Elija eerire mũtumia ũcio ũũ: ‘Ta rora! Mwana waku arĩ muoyo.’ Mũtumia ũcio nĩ aakenire mũno na akĩra Elija ũũ: ‘Rĩu nĩ ndamenya atĩ ũrĩ mũndũ wa Ngai. Ndaamenya ũguo tondũ waragia ũrĩa Jehova akwĩrĩte.’