Pefimbo londjala, Jehova okwa li a lombwela Elia a ti: ‘Inda kuSarfat, oto ka pewa oikulya komufiyekadi e li ko.’ Elia okwa li a hanga omufiyekadi wohepele poshivelo shoshilando ta tyava oikuni. Okwa li e mu pula omeva. Ofimbo omufiyekadi a li ta ka tala omeva, Elia okwe mu ingida ta ti: ‘Etelele nge ko okapambu komungome.’ Ashike omufiyekadi okwa ti: ‘Kandi na sha nandenande omungome ndi kupe. Ondi na ashike oufila nomaadi ya wana okuteleka okamungome kanini kange nokokamonamati kange.’ Opo nee Elia okwa tya: ‘Jehova okwa udaneka kutya ngeenge owa telekele nge omungome, oufila nomaadi oye itaa ka pwa mo fiyo odula ya loka.’

Omufiyekadi okwa ya meumbo ndele ta telekele omuprofeti waJehova omungome. Ngaashi naanaa Jehova a udaneka, omufiyekadi nomonamati waye ova kala alushe ve na oikulya pefimbo loshikukuta. Oufila moshiyuma shaye nomaadi aye inaa pwa mo.

Ashike opa ka ningwa oshinima shinyikifa oluhodi. Okamonamati komufiyekadi oka li ka hovela okuvela neenghono ndele taka fi. Omufiyekadi okwa li a pula Elia e mu  kwafele. Elia okwa li a kufa okamati komufiyekadi ndele te ka twala monduda i li pombada meumbo lomufiyekadi. Okwe ka nangeka kombete ndele ta ilikana ta ti: ‘Jehova, alikana nyumuna okaana aka.’ Mbela ou shii kutya omolwashike oshinima osho Jehova a li a ninga sha li shikumwifa? Omolwaashi kape na nande oumwe a li a nyumunwa pefimbo opo. Shimwe vali, omufiyekadi nokamonamati kaye kava li Ovaisrael.

Okamati oka li ka nyumuka. Opo nee Elia okwa ti komufiyekadi: ‘Tala, omonamati woye oku na omwenyo.’ Omufiyekadi okwa li a hafa neenghono ndele ta ti kuElia: ‘Ove omulumenhu ha tila Kalunga. Ondi shi shii molwaashi oho popi ashike osho Jehova e ku lombwela.’