Insay di tɛm we ren nɔ bin de kam ɛn plant dɛn nɔ bin de gro, Jiova bin tɛl Ilayja se: ‘Go na Zɛrafat. Wan uman we in man dɔn day go gi yu tin fɔ it.’ We Ilayja bin de na di siti in get, i si wan uman we in man dɔn day de gɛda wud. I beg am fɔ mek i gi am wata. As i de go fɔ go tek am, Ilayja kɔl am bak ɛn tɛl am se: ‘Duya, gi mi smɔl bred.’ Bɔt di uman we in man dɔn day tɛl am se: ‘A nɔ gɛt bred. Na smɔl flawa ɛn ɔyl nɔmɔ a gɛt fɔ mek it fɔ mi ɛn mi bɔypikin.’ Ilayja tɛl am se: ‘Jiova dɔn prɔmis se if yu mek smɔl bred fɔ mi, yu flawa ɛn ɔyl nɔ go dɔn te ren kam bak.’

So di uman we in man dɔn day go na os ɛn mek bred fɔ Jiova in prɔfɛt. Jɔs lɛk aw Jiova dɔn prɔmis, di uman we in man dɔn day ɛn in bɔypikin bin gɛt tin fɔ it di tɛm we ren nɔ bin de kam. In flawa ɛn ɔyl nɔ dɔn.

 Dɔn bad bad tin apin. Di uman we in man dɔn day in bɔypikin sik te i day. I beg Ilayja fɔ ɛp am. Ilayja tek di bɔbɔ na in an ɛn kɛr am go ɔp di os. I le am dɔŋ na wan bed ɛn pre se: ‘Jiova, duya gi dis pikin layf bak.’ Yu no wetin mek i go rili fayn if Jiova du dat? Frɔm wetin wi no, nɔbɔdi nɔ ɛva day ɛn gɛt layf bak bifo dis tɛm. Ɛn dis uman ɛn in bɔypikin nɔto bin Izrɛlayt dɛn.

Bɔt di bɔbɔ bin gɛt layf bak, ɛn i bigin fɔ blo! Ilayja tɛl di uman we in man dɔn day se: ‘Luk! Yu bɔypikin dɔn gɛt layf bak.’ Di uman bin rili gladi, ɛn i tɛl Ilayja se: ‘Yu na man we biliv Gɔd. A no dis bikɔs na wetin Jiova tɛl yu na in nɔmɔ yu de tɔk.’