Teleŋ wɔɔle kala kalaleŋ le wa wo, mi Chɛhowa dimul Ilaacha aa: ‘Kɔ Saluɛfati. A cho komal wɛɛŋ vii pɔnɔɔ wo loŋ mbo ke num nyɛdiaa.’ Mɛɛ Ilaacha fuuluu o kpaki chioo sondoo, mbo cha wɛɛŋ bala fondo vii pɔnɔɔ wo yɔmnde tiŋgɔɔ. Mi Ilaacha piɛi ndu mɛŋndaŋ le kolɔɔ. Mɛɛ wɛɛŋndo wa kɔlaŋ le ndu mɛŋndaŋ kondullo, mi Ilaacha dimul ndu aa: ‘Yandii, a wa hunɔɔ pɛ, a chuu ya beediiyo o ba kpuŋgbɛi ipilɛ.’ Kɛ mi wɛɛŋndo dimul ndu aa: ‘Beedii kɛ kɛ cho ya o ba le mi ke num te. Kolo luamaa beediiyo a chuɛiyaŋ nyɛɛmbɔ koni ya nɔ ni, le nyɛdiaa pɔmbɔ toosiaa le naa po nuu.’ Mi Ilaacha dimul ndu aa: ‘Chɛhowa chua buŋgɛi maa te a ke ya pɛ beediiyo o tiŋ, haaa mi piɔɔ kandu siaa, kolo ŋ luam beediiyo wo a chuɛima numndaŋ ma cho num chuwɔɔ o ba le.’

Okoŋ, mi wɛɛŋ vii hoo pɔnɔɔ wo kua mbo kɔ toosiaa beediiyo le wana suaa le Mɛlɛka wo. Nduyɛ a mɛɛ Chɛhowa ndoo chua buŋgɛi yɛ, wɛɛŋndo hoo nda po ndɔɔ wa nyɛdiaa sɔlaa teleŋ o teleŋ haaa mi wɔɔle kala kalaleŋ le chuu. Le teleŋ o teleŋ, kolo luamaa beediiyo a chuɛiyaŋ ma wa ndu o ba.

 Kɛ mi suɛi wɔɔŋii pum i yɔŋnuŋ. Mi poombɔ wɛɛŋ vii hoo pɔnɔɔ wo del a naa, nduyɛ mbo wu. Mi wɛɛŋndo hoo nyɔɔlu Ilaacha le mbo mala ndu. Mi Ilaacha bii ndu poombɔɔ o ba, okoŋ mbo hel a ndu o lumuiyo o chiɛi choo choo nda wa niŋndo. Mi Ilaacha yambu poombɔɔ o kpele, mbo piɛi aa: ‘Yandii Chɛhowa, miŋgi poombɔɔ hoo yoomu.’ A sina pa le sabu hei wa suɛi kɔndɔfili le mi Chɛhowa ndoo tosa ndi wo? Kanifuule, lepilɛ bɛɛ wana o wana ndoo vi wɔ mbo miiŋgu yoomu le. Nduyɛ wɛɛŋndo hoo nda po ndɔɔ, ndaa fula o kaale Isɔluɛiya choo le.

Okoŋ kɔɔli, mi poombɔɔ kandu yoomuaŋ chuaa, nduyɛ mbo miiŋgu yoomu. Mi Ilaacha dimul kala ndɔ aa: ‘A che po numndo. O miiŋgu yoomu.’ Mi wɛɛŋndo hoo duaunuŋ nyaale tau, okoŋ mbo dimul Ilaacha aa: ‘I sina niŋ kɛsɛ maa wana suaa le Mɛlɛka wo ŋ cho ni. Kanifuule, nyɛ Chɛhowa dimul numndo, ndu kinɛi ŋ dimi ni.’