တၢ်မၤလိ ၄၈
မုၣ်ကမဲတဂၤအဖိခွါ ဂဲၤဆၢထၢၣ်သမူထီၣ်က့ၤ
ဖဲတၢ်ယီၤဃ့အဆၢကတီၢ်န့ၣ် ယဟိဝၤယွၤတဲဘၣ်ဝံအ့ၤလံယၤလၢ– ‘လဲၤလၢဝ့ၢ်စၤရဖၤသးအပူၤတက့ၢ်. မုၣ်ကမဲတဂၤကဒုးအီၣ်ဒုးအီနၤလီၤ.’ ဖဲဝံအ့ၤလံယၤလဲၤတုၤလၢ ဝ့ၢ်အပဲတရီအခါ အဝဲထံၣ်ဘၣ်ဝဲမုၣ်ကမဲလၢအဖှီၣ်အယာ်တဂၤ ထၢဖှိၣ်ထီၣ်ဝဲသ့ၣ်မုၣ်လီၤ. ဒီးဝံအ့ၤလံယၤ ဃ့အီထံတခွးလၢအအိၣ်လီၤ. ဖဲမုၣ်ကမဲအံၤကက့ၤဟံးန့ၢ်အီၤထံအခါ ဝံအ့ၤလံယၤတဲဘၣ်အီၤလၢ– ‘ဝံသးစူၤဟဲစိာ်န့ၢ်ယၤ ကိၣ်တဘ့ၣ်နီၤ.’ ဘၣ်ဆၣ် မုၣ်ကမဲတဲဆၢက့ၤအီၤလၢ– ‘ယကိၣ်တအိၣ်ဘၣ်. ယအိၣ်ဒီး ကိၣ်ကမူၣ်ဒီးသိထဲတစဲးဖိလၢ ယၤဒီးယဖိခွါအဂီၢ်လီၤ.’ ဝံအ့ၤလံယၤ တဲဘၣ်မုၣ်ကမဲလၢ– ‘ယဟိဝၤယွၤအၢၣ်လီၤအီလီၤဝဲလၢ နမ့ၢ်တ့န့ၢ်ယၤကိၣ်န့ၣ် နကိၣ်ကမူၣ်ဒီးနသိကအိၣ်ဒံး တုၤလီၤလၢ တၢ်စူၤလီၤဝဲတစုလီၤ.’
လၢတၢ်န့ၣ်အဃိ မုၣ်ကမဲတဂၤအံၤက့ၤလၢဟံၣ် ဒီးတ့ဝဲကိၣ်လၢ ယဟိဝၤယွၤအဝံအဂီၢ်လီၤ. ဒ်ယဟိဝၤယွၤ အၢၣ်လီၤအီလီၤဝဲအသိး ဖဲတၢ်ယီၤဃ့အဆၢကတီၢ်န့ၣ် မုၣ်ကမဲဒီးအဖိခွါ အတၢ်အီၣ်တၢ်အီ အိၣ်ဝဲထီဘိလီၤ. ကိၣ်ကမူၣ်ဒီးသိလၢ မုၣ်ကမဲအသပၢၤအပူၤန့ၣ် တလၢာ်ဝဲနီတဘျီဘၣ်.
လၢခံ တၢ်လၢအလီၤသူၣ်အုးသးအုး ဟဲကဲထီၣ်အသးတခါလီၤ. မုၣ်ကမဲအဖိခွါဆိးက့ ဒီးသံဝဲလီၤ. မုၣ်ကမဲဃ့ကညး ဝံအ့ၤလံယၤလၢကမၤစၢၤအီၤလီၤ. ဝံအ့ၤလံယၤလဲၤစိာ်ထီၣ်ဖိသၣ်ဆူ
ဟံၣ်ဖီခိၣ်လီၤ. ဝံအ့ၤလံယၤပာ်လီၤ ဖိသၣ်လၢလီၢ်မံခိၣ် ဒီးဃ့ဘါထုကဖၣ်ဝဲလၢ– ‘ယဟိဝၤယွၤဧၢ, ဝံသးစူၤမၤသမူထီၣ်က့ၤ ဖိသၣ်အံၤတက့ၢ်.’ ယဟိဝၤယွၤမၤသမူထီၣ်က့ၤ ဖိသၣ်ပိာ်ခွါတဂၤအံၤန့ၣ် မ့ၢ်တၢ်လီၤလးလၢ အလီၤကမၢကမၣ်ဖးဒိၣ်တခါလီၤ. မ့ၢ်လၢဖိသၣ်တဂၤအံၤ မ့ၢ်ပှၤအဆိကတၢၢ်တဂၤလၢ ဘၣ်တၢ်မၤသမူထီၣ်က့ၤအီၤန့ၣ်လီၤ. ဒီးမုၣ်ကမဲတဂၤအံၤဒီးအဖိခွါန့ၣ် တမ့ၢ်ပှၤအံၣ်စရ့လးဖိဘၣ်.ဖိသၣ်တဂၤအံၤ ဂဲၤဆၢထၢၣ်သမူထီၣ်က့ၤဝဲ ဒီးဝံအ့ၤလံယၤတဲဘၣ်မုၣ်ကမဲလၢ– ‘ကွၢ်လၢအံၤ. နဖိခွါသမူထီၣ်က့ၤဝဲလံ.’ မုၣ်ကမဲအံၤသးခုဝဲဒိၣ်မး ဒီးတဲဘၣ်ဝံအ့ၤလံယၤလၢ– ‘ယသ့ၣ်ညါသပှၢ်ကတၢၢ်လၢ နမ့ၢ်ယွၤအခ့အပှၤတဂၤလီၤ. ဒီးကယဲၢ်တၢ်လၢနတဲခဲလၢာ်န့ၣ် နတဲဒ် ယဟိဝၤယွၤ မၢနတဲအသိးလီၤ.’
“ကွၢ်ဆိကမိၣ်စိးဝၣ်ဃးတက့ၢ်. တဖှံဘၣ်တၢ်ဘၣ်, တကူးဘၣ်တၢ်ဘၣ်, အသိၣ်အဖီတအိၣ်ဘၣ်, ဒီးယွၤဘုၣ်အီၣ်ဘုၣ်အီအီၤလီၤ. သုဂ့ၤန့ၢ် ထိၣ်ဖိလံၣ်ဖိဆံးဒိၣ်လဲၣ်.”—လူၤကၣ် ၁၂:၂၄