Muna kolo kina e mvula ke zanokanga ko, Yave wavovesa Eleya vo: ‘Telema, wenda kuna Sarefate. Owana nkento mosi ansona okuvana madia.’ Vava kalwaka vana mwelo a mbanza, Eleya wamona nkento mosi wa nsukami watiamanga e nkuni. Eleya wanlomba kopo dia maza. Vava nkento kayenda baka e maza, Eleya wamvovesa vo: ‘Dodokolo, untwasila mpe fimbolo.’ Kansi, o nkento wavova vo: ‘Kina kwame ye mbolo ko ndenda kuvana. Mfumfu akete kaka ngina yau ye mazi mana ilambila madia ma mwan’ame yo mono kibeni.’ Eleya wamvovesa vo: ‘Yave osidi nsilu vo avo ovangidi e mbolo mu kuma kiame, e mfumfu yo mazi maku ke mefokoka ko yavana e mvula inoka diaka.’

Muna kuma kiaki, o nkento ansona wayenda kuna nzo yo vangila ngunz’a Yave mbolo. Nze una Yave kasia o nsilu, o nkento ansona yo mwan’andi ke bakondwa madia ko muna mvu mina e mvula ke zanokanga ko. E mbangu zina kalundilanga e mfumfu yo mazi zazala kaka zakalanga.

 I bosi, diambu dimosi diampasi diabwa. O mwan’a nkento ansona wabakama kimbevo kiangolo yo fwa. O nkento wadodokela Eleya kimana kansadisa. Eleya wasimba o mwana vana moko mandi yo kunata kuna suku dia ntandu dia nzo a nkento ansona. Wanlekesa vana mfulu yo samba vo: ‘E Yave, dodokolo, yambula vo mwana kavutuka o zinga.’ Nga ozeye e kuma diambu dina Yave kevanga owau diakadila diasivi? E kuma kadi nze una tuzeye, ke muntu ko wateka fulwa kala. Vana ntandu, o nkento ndioyo yo mwan’andi ke bakala nkutu Aneyisaele ko.

O moyo a mwana wavutuka yo yantika fulumuna. Eleya wavovesa nkento ansona vo: ‘Tala! O mwan’aku una moyo.’ O nkento wayangalala kikilu, wavovesa Eleya vo: ‘Ngeye u muntu a Nzambi kikilu. Nzeye wo kadi ovovanga kaka mana Yave kavovese.’