Toj ambʼil tej mintiʼ kubʼ jbʼal, xi tqʼamaʼn Jehová te Elías: «Txiʼya tuj tnam Sarepta, ex tzul qʼoʼn twaya tuʼn jun xuʼj viud». Tej pon Elías ttzi tnam, ok tqʼoʼn twitz tiʼj jun xuʼj viud in jyon siʼ ex xi tqanin jun vas tkʼaʼ aʼ te. Tej t-xiʼ xuʼj jyol aʼ, ax ikx xi tqʼamaʼn Elías te: «Najsama, ax ikx qʼintza jun piẍ npane». Atzunte xuʼj viud xi ttzaqʼweʼn te: «Mintiʼ pan at wukʼile, mlay bʼant tuʼn t-xi nqʼoʼne jun tiʼ teya. Oʼkx at chʼin arin ex aseyt wukʼile tuʼntzun tkubʼ nbʼinchaʼne chʼin qwaye tukʼil wale». Xitzun tqʼamaʼn Elías te: «Ma tzaj ttziyen Jehová weye qa ma bʼaj tbʼinchaʼna jun piẍ npane, kukx ktel arin ex aseyt tukʼila tzmaxi aj tkubʼ jbʼal juntl maj».

Tuʼntzunju, xiʼ xuʼj tja ex kubʼ tbʼinchaʼn jun tpan tsanjel Jehová. Kukx ten twa xuʼj viud tukʼix tal toj ambʼil tej mintiʼ kubʼ jbʼal ik tzeʼn otoq tqʼama Jehová. Mintiʼ kubʼ bʼaj t-aseyt nix t-arin toj tkubʼil.

Yajxitl, bʼaj jun tiʼ bʼisbʼajilx. Tzaj yabʼil tiʼj tal xuʼj viud ex kyim, ex xi tqanin onbʼil te Elías. Eltzun tiʼn Elías tal qʼa toj tqʼabʼ ttxuʼ ex xi  tiʼn toj jun tal kwart toj tkabʼin kol ja. Yajxitl, kubʼ tqʼoʼn twiʼ jun watbʼil ex ok ten naʼl Dios kyjalu: «Jehová, in chin kubʼsane twitza tuʼn tjaw anqʼin tal qʼa lu tuʼna». ¿Ojtzqiʼn tuʼna tiquʼn jaku qo jaw labʼin qa ma jaw anqʼin tal qʼa lu tuʼn Jehová? Tuʼnju atzun tnejel maj kjawil anqʼin jun kyimni. Nya oʼkxju, ax ikx tuʼnju nya te tnam Israel xuʼj nix aju tal.

Tzyet t-xewin tal qʼa juntl maj ex jaw anqʼin. Xi tqʼamaʼn Elías jlu te xuʼj viud: «Keʼyinxa, ma jaw anqʼin tala». Nim jaw tzalaj xuʼj ex xi tqʼamaʼn te Elías: «Atzun jaʼlo, ma tzʼel nnikʼe tiʼj qa in najbʼena te Dios. Tuʼnju aju in tzaj tqʼamaʼna atz tzajni tukʼil Jehová, tuʼntzunju kukx in japun twiʼ».