Saagã sẽn da wa n pa le niid Israyɛllã, a Zeova yeela a Eli yaa: ‘Kẽng Sarepta, pʋg-kõor a ye nengẽ. A na n dɩlga foo.’ A Eli sẽn ta tẽngã noore, a yãa pʋg-kõor sẽn wʋkd raado, t’a kos-a koom n na n yũ. Pagã sẽn kẽng n na n tɩ yãk koomã, a Eli yeel-a lame t’a kell n zã rɩɩb n wa kõ-a. La pagã yeelame: ‘Mam pa tar rɩɩb n na n kõ foo ye. Mam tara zom ne kaam bilf bala, n dat n segl tɩ maam ne m biigã rɩ.’ T’a Eli yeel-a yaa: ‘A Zeova yeelame tɩ f sã n segl n kõ maam, fo zomã ne f kaamã pa na n tol n sa hal tɩ saagã wa sɩng niibu.’

Pagã sɩd kuilame n tɩ segl rɩɩb n kõ a Zeova no-rɛɛsã. Wa a Zeova sẽn yeelã, pagã ne a biigã paama rɩɩb hal tɩ saagã wa sɩng niibu. A zomã ne a kaamã ka tol n sɛ ye.

La yel-beed n wa n maane. Pʋg-kõorã biig lʋɩɩ bãaga, n ki. A kosa a Eli t’a sõng-a. A Eli reega biigã n kẽng yĩngr doogẽ wã, n tɩ gãneg-a gãag zugu. A pʋʋsa a Zeova n yeel yaa:  ‘Zeova, m kotame tɩ f kɩt tɩ biigã vʋʋge.’ Fo mii bũmb ning sẽn kɩt t’a Zeova sẽn na n maanã sɩd yaa bõn-kãseng meng-mengã bɩ? Bala ned sẽn ki ra zɩ n vʋʋg ye. Sẽn paase, pʋg-kõorã ne a biigã ra pa Israyɛll neb ye.

A Eli sẽn vʋʋg biigã poore, a tall-a lame n kẽng pagã nengẽ n yeel-a yaa: ‘Gese, fo biigã vʋʋgame.’ Pagã sũur yɩɩ noog wʋsgo, t’a yeel a Eli yaa: ‘Fo sɩd yaa Wẽnnaam neda. Bala a Zeova sẽn yet foomã la fo togsda, la pidsda wakat fãa.’