Pa nguva yo cikava, Jehovha wakabvunja Eria kuti: ‘Mukai uende kuSarepeta. Noni iri kondhoyo inozokupa zvokuha.’ Paakaguma pamusuvo wo guta, Eria wakavona noni yaibojera huni. Wakakumbira noni yondhoyo kumwa. Payaienda kotora kumwa, Eria wakaibvunjazve kuti: ‘Ndiviisirezve no cidimbu co pau.’ Asi noni yakati: ‘Andina pau kuti ndimupe. Ndina padoko upfu uri mu thevo no mafuta ari mu juvi kuti ndibikire mwana wangu pomwe na inini basi.’ Eria wakabvunja noni kuti: ‘Jehovha wakagondesa kuti kudari ukadibikira pau, thevo rako no juvi rako ro mafuta azvizoperi mbhera nvura inezve ngo papsa.’

Ngo kudaro noni yakaenda kanyi zve yobikira pau muporofita wa Jehovha. Inga zvakagondesa Jehovha, noni iya pomwe no mwana wayo vakava no zvokuha nguva yese. Thevo ro upfu arizivi kupera, no juvi ro mafuta arizivi kuperavo, inga zvaakananga.

Asi pano ciro cakashata maningi cakazoitika. Mwana worume wo noni iya, wakahwaja zvokuti wakafa. Iyena  wakakumbira Eria kuti amubesere. Eria wakatora mwana mu nyara jake zve woenda naye mumba pa nyezuru paaigara. Wakamudira pa bonde zve wakaita mukumbiro eciti: ‘Jehovha, ndapota itanyi kuti mwana uu apone.’ Unozviziva kuti ngenyi zvakava zviro zvinoshamaisa zvakaitwa ndi Jehovha? Ngokuti inga zvatinoziva, apana umwe mundhu wakafa wakambomuswa, izvo zvainga zvicito zvaitika. Zve noni iyi no mwana wayo avacaingepi vaIziraeri.

Asi mujaha wakavazve no upenyu, zve wotanga kufema! Eria wakati ku noni: ‘Vonai! mwana wako anopona.’ Noni yakadakara maningi zve yobvunja Eria kuti: ‘Wari ndozviziva kuti muri mundhu wa Mwari. Ndinozviziva izvo ngo kuti munovereketa zvamunobvunjwa ndi Jehovha kuti muverekete.’