Ipan tonaltin ijkuak ok xkiyauiya, Jehová okijli Elías: “Xuiya Sarepta. Ompa se siuakauajli mitstlakualtis”. Ikalakiayan ueyikalpan, Elías okitak se siuakauajli akin xtlaj kipiaya, tlakopejpentok. Elías okitlajtlanili atl. Ijkuak siuakauajli ikonkuiliskia, Elías okijli: “Nimitstlajtlanilia, xnechuajkuili pan”. Siuakauajli okinankili: “Xnikpiya pan tlen uelis nimitsmakas. San nikpiya achijtsin tlen chiauak niman harina tlen ika nikchijchiuas tlen tijkuaskej nejua iuan nokoneuj”. Elías okijli: “Jehová yokijto ika tla tinexchijchiuilia pan, xtlamis tlen chiauak niman harina tlen tikpiya, hasta ijkuak oksejpa kiyauis”.

Kuakon siuakauajli oyaj ichan niman okichijchiuili pan. Ijkon ken Jehová okijtoka, siuakauajli niman ikoneuj nochipa okipixkej tlen kikuaskej ijkuak ok xkiyauiya. Kontin tlen kipiayaj tlen chiauak niman harina xotlankej.

 Kuakon opanok itlaj tlen teajman. Ikoneuj siuakauajli melak okualok niman omik. Yejua okitlatlaujti Elías makipaleui. Elías okontilanili ikoneuj siuakauajli niman okuikak tlakpak kampa kochiya, okitekak ipan itlapech niman okichiuj teoyotl, okijto: “Jehová, nimitstlajtlanilia, xyoliti yejuin konetl”. ¿Tikmati tleka melak temojkatlachialtiskia tla Jehová kichiuaskia yejon? Pampa xkeman nomatiya tla yakaj mayoliui. Noijki pampa siuakauajli niman ikoneuj xkatkaj israelitas.

Kuakon, konetl opeuj nijyotia niman oyoliuj. Elías okijli siuakauajli: “¡Xkita! Mokoneuj yoltika”. Yejua melak opak niman okijli Elías: “Aman nikmati ika toTajtsin omitsajtitlan. Tlen tikijtoua ualeua itech Jehová niman nochipa nochiua”.