Doo nahałtin yę́ędą́ą́ʼ Jiihóvah Iiláíjah ííłní: ‘Zárefathgóó dínááh. Áadi asdzání bąąh áhásdįįdii łaʼ naʼdoołtsoł.’ Kin haalʼá bidáńʼdítı̨́įhígi asdzání bąąh áhásdįįdii léiʼ chizh náyiiláahgo jiiłtsą́. Tó łaʼ shaa níkaah, bizhdííniid. Yíká dah diiyáago ábijiní: ‘Tʼáá shǫǫdí, bááh ałdóʼ łaʼ shá nídííʼááł.’ Asdzání áháłní: ‘Shiyáázh dóó shí tʼáá nihíighahígo akʼáán dóó akʼah nihee hólǫ́, áko bááh naa deeshʼáłígíí shee ádin.’ Áko Iiláíjah áháłní: ‘Jiihóvah éí bááh shá íinilaago, ninááhółtą́ąjįʼ akʼáán dóó akʼah doo nitsą́ą́ʼ ádoodįįł dago yee nihoníʼą́.’

Áko asdzą́ą́ éí Jiihóvah yá halneʼii bááh bá ájiilaa. Doo nahałtin da ndi, asdzą́ą́ dóó biyáázh éí bichʼiyąʼ hólǫ́. Akʼáán dóó akʼah tʼáadoo bitsʼą́ą́ʼ ásdįįd da. Jiihóvah yee nihoníʼánę́ę bohoolyaa.

 Ńtʼééʼ doo yáʼátʼéhígi áhoodzaa. Asdzą́ą́ biyáázh yéigo bitah honiigaigo daaztsą́. Asdzą́ą́ éí Iiláíjah, shíká anilyeed, níigo náyozkan. Díí asdzą́ą́ dóó biyáázh doo Ízrel dineʼé jílı̨́į da. Ákondi, Iiláíjah éí wódah hazʼą́ądi ashkii yázhí tséskʼeh bikááʼ nizhníłtı̨́įgo sozdoolzin: ‘Jiihóvah, tʼáá shǫǫdí, díí ashkii yázhí iiná baa nidiníʼaah.ʼ Ashkii yázhí nínéidiisáago, Jiihóvah ayóó átʼéego ádzaa dooleeł. Haitʼéego bééhózin? Jó, diné tʼahdoo łaʼ daaztsą́ą́dę́ę́ʼ náábiʼdiilzáa da ńtʼééʼ.

Ashkii yázhí éí nááhididziihgo iiná biiʼ náhásdlı̨́ı̨́ʼ. Iiláíjah éí ashkii bimá ííłní: ‘Shoo, niyáázh hiná.’ Asdzą́ą́ tʼáá íiyisí bił hóózhǫǫdgo Iiláíjah ííłní: ‘Ni éí tʼáá aaníi Diyin yá halneʼii nilı̨́ı̨́ lágo shił bééhoozin. Háálá Jiihóvah áníłníinii tʼéiyá bee yáníłtiʼ.’