Momanima ombila ihalokele, Jeova apopila Eliya okuti: ‘Enda ko Salefa. Omuhepe umwe mekuavela okulia.’ Etyi ehika kotyilongo otyo, Eliya amono omuhepe umwe wahepa unene utiava ononkhuii. Eliya emuiiti omaande. Tyina akapola omaande Eliya emupopila vali okuti: ‘Mbambavo tupu etelela ombolo.’ Mahi omuhepe emupopila okuti: ‘Ame ndyitupu ombolo. Ame ndyina vala okahinde nokamulela kehehi pala ame nomona wange.’ Eliya emupopila okuti: ‘Jeova walaa okuti inkha undingila ombolo, mokala nomulela nohinde alo ombila iiya.’

Omuhepe aende keumbo liae alingila ombolo omuuli wa Jeova. Ngetyi Jeova apopia, omuhepe nomona wae apeho vakalele nokulia omanima aeho ombila ihaloko. Omulela wae nohinde nalumwe viapuile-mo.

Apamoneka otyipuka tyimwe. Omona womuhepe avele unene iya ankhi. Omuhepe aiti Eliya emukuateseko. Eliya aumphula-po  omona emutuala keulu liondyuo. Alangeka omona koula ehimbika okulikuambela okuti: ‘Jeova mbambavo omona ou akale vali nomuenyo.’ Utyii omokonda yatyi tyihuvisa unene inkha Jeova ulinga ngotyo? Mokonda tutyii okuti alo pomuvo opo petupu omunthu wankhile akala vali nomuenyo. Iya omuhepe oo nomona wae ankho ha va Isilayeli.

Mahi omona akala vali nomuenyo! Eliya apopila omuhepe okuti: ‘Tala! Omona wove una omuenyo.’ Omuhepe ahambukwa unene apopila Eliya okuti: ‘Ove tyili-tyili umunthu wa Huku. Ame ndyityii, mokonda ove upopia vala etyi Jeova ekutuma.’