Diad samay panaon ya walay eras ed Israel, imbaga nen Jehova ed si Elias: ‘La kad syudad na Zarepat. Diman et walay biin balo ya ikdan to kay naakan.’ Kasabi nen Elias ed puerta na syudad, anengneng to so pakaskasin biin balo ya mandodokdok na kiew ya itungo to. Kinmerew si Elias na danum ya inumen. Nen oonla la may bii pian mangalay danum, imbaga nen Elias: ‘Iyalaan mo ak pa met na tinapay.’ Balet imbaga to may bii: ‘Anggapoy niiter kod sika ya tinapay. Walay daiset ya arina tan larak ko, balet dugaruga labat itan pian makagawa ak na melag ya tinapay ya kanen mi na ana’ko.’ Imbaga nen Elias ed sikato: ‘Im-promise nen Jehova ya no igawaan mo ak na tinapay, agka naupotan na arina tan larak anggad onuran lamet.’

Kanian sinmempet imay bii ed abung to tan nanggaway tinapay parad propeta nen Jehova. Tinmua imay imbaga nen Jehova, agnaupotan na naakan so balo tan say anak to legan na panaoy eras. Lanang ya napno so pananginan toy arina tan larak.

 Balet walay makapaermen ya agawa. Nansakit so anak to may bii tan inatey. Akikasi ed si Elias ya tulongan to. Inawit nen Elias so ugaw ed kuarto ed tagey na abung na bii. Imparukol to ed dukolan tan nampikasi: ‘Jehova, panangasim, bilay mo lamet yay ugaw.’ Antam no akin ya makapakelaw no bilayen nen Jehova so ugaw? Ta diad saman, anggapo nin balot so inatey ya abilay lamet. Sakey ni, aliwan Israelita iyan bii tan say anak to.

Balet abilay lamet so ugaw tan oniingas la! Imbaga nen Elias ed bii: ‘Ni, mabilay so anak mo!’ Malikeliket so biin balo tan imbaga tod si Elias: ‘Antak la natan ya talagan sakey kan too na Dios, ta amin ya ibabagam et nanlapud si Jehova tan lanang ya tua.’