Erein eh sohte keteu, Siohwa mahsanihong Elaisa: ‘Kohla Sarepad. Mie liohdi men wasao me pahn kamwengeiuk.’ Ni kelen kahnimwo, Elaisa kilangada liohdi semwehmwe men me wesewesei tuwi. Ih eri peki rehn liho kep en pihl ehu. Ni liho eh kolahng ale pihlo, Elaisa ahpw likwerlahng, nda: ‘Menlau iangahkihdo kenei ekis kisin pilawahn.’ Liohdio ahpw sapengki: ‘Sohte pilawa me I kak kihong uhk. Mie pilawa oh kisin kirihs me itarongete ien wiahda kisin mwenge ong ngehi oh nei pwutako.’ Elaisa ahpw ndaiong: ‘Siohwa ketin inoukihda me ma ke pahn wiahda ekis pilawa ong ie, konomw pilawa oh kirihs sohte pahn nekla lao e pahn pwurehng keteu.’

Eri liohdio ahpw kohla ni imweo oh wiahda pilawa ong sapwellimen Siohwa soukohpo. Duwehte me Siohwa ketin inoukidahr, ahnsou koaros mie kenen liohdio oh nah pwutako mwenge erein eh sohte keteu. Nah deupen pilawao oh kirihso kin wie dindirte.

Eri, kedekedeo mie mehkot me inenen kansensuwed wiawi.  Nein liohdio kisin pwutako soumwahuda oh mehla. Ih eri peki Elaisa en sewese. Elaisa eri ale kisin pwutako sang nan pehn liho oh wahdahla nan pere ehu powe nan imwen liho. Ih eri kauwendi pohn pehto oh kapakap: ‘Siohwa, komw menlau ketin kamourada kisin seriet.’ Ke ese dahme kahrehda met pahn wia mehkot kapwuriamwei ehu me Siohwa pahn ketin wia? Pwehki nin duwen atail ese, saikinte emen me mehla pwurehng mourda mwohn met eh wiawi. Oh liohdio oh nah pwutako kaidehn uhdahn mehn Israel kei.

Pwutako ahpw pwurehng mourda oh e tepida pwurehng esingek! Elaisa ahpw ndaiong liohdio: ‘Nna kilang! Noumw pwutaken mourdahr!’ Liho uhdahn perenkihda oh ndaiong Elaisa: ‘Mehlelete me kowe ohlen Koht men. I ese met pwehki ke kin koasoiahte dahme Siohwa mahsanihong uhk ken koasoia.’