Pa taq ri qʼij che kʼo ta xkʼiy pa ri ulew, Jehová xubʼij che Elías: «Jat pa Sarepta. Chilaʼ kʼo jun malkaʼn ixoq kuya awa». Chuchiʼ ri tinamit, Elías xril jun malkaʼn ixoq che mebʼaʼ tajin kuyak usiʼ, xutaʼ jubʼiqʼ ujoron che. Are chiʼ ri ixoq xbʼe che ukʼamik, Elías xubʼij che: «Chabʼanaʼ toqʼobʼ, xuqujeʼ chayaʼ jun chʼaqap nukaxlanwa». Are kʼu ri malkaʼn ixoq xubʼij che: «Kʼo ta nukaxlanwa, kʼo ta kinkunik kinya chawe. Xaq xiw kʼo kʼaj xuqujeʼ aceite rech kinkoj che ubʼanik nuwa xuqujeʼ re ri wal». Elías xubʼij che: «Jehová utzujum che we kabʼan jun nukaxlanwa, kkʼis ta ri aceite xuqujeʼ ri akʼaj kʼa kkʼis ri qʼij che kubʼan ta jabʼ».

Rumal laʼ ri malkaʼn ixoq xbʼe pa rachoch xuqujeʼ xubʼan jun kaxlanwa che ri ajqʼaxal utzij ri Jehová. Ri malkaʼn ixoq xuqujeʼ ri ral kʼo xkitij ronojel ri tiempo che kʼo ta xuya ri ulew, junam che xutzujuj ri Jehová. Xkʼis ta ri kʼaj xuqujeʼ ri aceite.

Tekʼuriʼ xkʼulmataj jun jastaq che sibʼalaj bʼisobʼal. Ri alaj ral ri malkaʼn ixoq sibʼalaj xyawajik rumal laʼ xkamik, ri ixoq sibʼalaj  xutaʼ toqʼobʼ che ri Elías che kutoʼ. Tekʼuriʼ Elías xukʼam ri akʼal pa uqʼabʼ ri unan. Xukʼam bʼi pa jun cuarto che kʼo pa uwiʼ ri ja. Tekʼuriʼ xuqʼoyobʼaʼ xuqujeʼ xubʼan jun chʼawem: «Jehová, chabʼanaʼ toqʼobʼ, chayaʼ chi jumul ri ukʼaslemal ri akʼal». ¿La awetaʼm jasche sibʼalaj nim ubʼanik che Jehová xubʼan wariʼ? Rumal che pa taq ri qʼij riʼ, kʼo ta nijun kaminaq kʼastajisam. Xuqujeʼ nim ubʼanik, rumal che ri malkaʼn ixoq xuqujeʼ ri ral e israelitas taj.

Ri akʼal xuxlabʼ chi jumul xuqujeʼ xkʼasiʼ chi jumul. Elías xubʼij che ri malkaʼn ixoq: «¡Chawilampeʼ! Ri awal kʼaslik». Ri ixoq sibʼalaj xkikotik xuqujeʼ xubʼij che Elías: «Kimik wetaʼm chik che qastzij at jun achi re ri Dios. Ri kabʼij petinaq rukʼ ri Jehová, rumal laʼ amaqʼel kbʼantajik».