Ch’akiriy tiempopin Diosqa Eliasta niran: “Sarepta llaqtata riy, chaypin juj viuda mijunata qosunki”, nispa. Elías llaqtaman jaykushaqtinmi wajcha viuda llant’ata pallashasqa, jinan unuta mañakuran. Unuta apamunanpaq rishaqtintaq juj chikan t’antatawan mañakuran. Viudataq niran: “Manan imaypas kanchu. Jak’uwan aceitellawanmi kashan, chayqa noqawan wawaywan mijunallaykupaqmi kashan”, nispa. Eliastaq niran: “Jehová Diosmi prometen t’antata jaywariwanki chayqa, manan aceiteykipas jak’uykipas tukukunqachu wajmanta paramunankama”, nispa.

Chaymi viudaqa wasinman rispa t’antata ruwaran Jehová Diospa profetanpaq. Diospa prometesqanman jinan viudapaqpas wawanpaqpas mana aceitenpas jak’unpas tukukuranchu ch’akiriy tiempo tukunankama.

Chay qhepamanmi viudaqa sinchi llakipi tarikuran. Wawanmi sinchita onqospa wañupuran, jinan mamanqa  Eliasta valekuran yanapananpaq. Eliastaq wawata marq’arikuspa altos patapi cuartoman aparan. Camaman churaspataq mañakuran: “Jehová Diosniy, kay wawata kausarichiy”, nispa. Chay wawata kausarichiyqa admirakunapaqmi karan. ¿Imarayku? Chay tiempokamaqa manan pipas wañusqanmanta kausariranchu. Jinaspapas chay viudaqa manan Israel llaqtamantachu karan.

Jinan wawaqa kausariran, Eliastaq viudata niran: “¡Qhawariy! ¡Wawaykin kausashan!”, nispa. Payqa anchata kusikuspan Eliasta niran: “Kunanqa yachanin cheqaq Diospa profetan kasqaykita. Rimasqaykiqa Jehová Diosmantan jamun, chaymi junt’akun”, nispa.