Na tamiashpa chaquishca tiempopi causajujpimi Jehová Diosca Eliastaca nirca: ‘Sarepta llactapi causagri. Chaipimi shuj sapalla mamagu canman micunata caranga’ nishpa. ‘Chaiman chayashpaca, yamdata tandachijuj shuj sapalla mamaguta ricushpami’ Eliasca asha yacuguta carahuai nirca. ‘Yacuta apamungapaj ña rijujpimi, Eliasca cutin cayashpa: Asha tandagutapash apamupangui nirca’. Chaimi chai viuda mamaguca nirca: ‘Cusashca tandataca na charinichu. Asha jacuta, aceitetapash ashagutallami charini. Cunanga, tandata rurashpa, ñuca churihuan micungapajmi cai ishcailla yamdatapash tandachijurcani’ nishpa. Chaimi Eliasca nirca: Jehová Diosca cashnami nin, ñucaman shuj uchilla tortillata rurajpica ‘tamiachina punllacamanmi jacupash, aceitepash na tucuringa’ nishpa.

‘Shina nijpimi chai mamaguca, Elías imashna nishcashnallata rurangapaj rirca. Chashna rurashpami Eliaspash, chai sapalla mamagupash, paipa churipash tamiana punllacaman micushpa causanajurca. Eliasman Mandaj Dios villashcashnallatami jacupash, aceitepash na tucurirca’.

Chai jipaca shuj llaquimi chayamurca. Chai huarmipa churigumi ungüi japijpi huañurca. Chaimi chai huarmiguca Eliasta ayudahuai nirca. Shina nijpimi  Eliasca canba churiguta apamui nirca. Shina apamujpimi Eliasca chai huarmipa rigramanda japishpa, pai causajuj ucuman aparca. Chaiman apashpami paipa camapi sirichirca. Chaipi sirichishpami Eliasca Diosta cashna mañarca, Jehová Dioslla cai huahuaguta causachipai nishpa. Chai punllacamanga pitapash na causachishca carcachu. Chaimandami chai huahuaguta Jehová Dios causachishcata crinaca na fácil carca. Shinallata chai viuda huarmigupash, paipa huahuapash na Israel llactamanda carcachu.

Shinami chai viuda huarmigupa churiguca causarirca. Viuda huarmigumanga Eliasca nircami: “Ricui, cambaj churica causarircami” nishpa. Shina nijpimi chai huarmiguca ninanda cushijushpa cashna nirca: “Taita Diospaj runagu cajtaca, cunanmi yachani. Mandaj Diospacha paipaj shimita villachun mandajpi, na llullashpa villajushcatapashmi yachani” nishpa.