Dži ko Izrael hine o šukipe ki phuv, o Jehova phendža e Ilijase: „Dža ki Sarepta. Uduri jekh udovica ka del tut te ha.“ Ked reslja ko e dizjake udara, o Ilija dikhlja jekha čorore udovica sar čedela kašta. Tegani, ov rodindža olatar hari pani. Ked dželji te anel ljese, ov vičindža palo late hem phendža lače: „Molinava tut, ana maje hem hari maro.“ Ama, oj phendža ljese: „Nane man maro te dav tut. Isi man samo hari varo hem zejtini te čerav diso me čhavese hem maje.“ O Ilija phendža lače: „O Jehova obećindža so ako dindžan man hari maro, tegani o varo hem o zejtini so isi tut, niked na ka trošinen pe sa dži paljem na džala boršim.“

Tegani i udovica dželji čhere hem čerdža maro e Jehovase prorokose. Sar so obećindža o Jehova adžahar hem ulo. I udovica hem olako čhavo hine ljen so te han sa dži na počmindža paljem te džal boršim. Sa odova vreme, o ćupija kaj hine o varo hem o zejtini, hine pherde.

 Jekh dive, ulo diso but lošno. E udovicako čhavo but naborsalo hem mulo. I udovica počmindža te molini e Ilija te pomožini lače. O Ilija ljelja lje ando olake vasta hem ljegardža lje upre ki soba ko čher. Mukhlja lje ko krevet hem počmindža te molini pe: „Jehova, molinava tut, irin paljem ko dživdipe akalje čhave.“ Odova so rodindža o Ilija hine but čudno. Da li džaneja sose? Odoljese so dži tegani niko na uskrsnindža. Ama na samo odova, nego akija udovica hem olako čhavo na hine Izraelcija.

Ama, o Jehova irindža ko dživdipe akalje čhave! O Ilija phendža e udovicače: „Dikh! To čhavo tano paljem dživdo.“ Oj hine but radosno hem phendža e Ilijase: „Akana džanava so tu hijan e Devljeso manuš. Džanava so vačereja samo odova so o Jehova phenela tuče te vačere.“