Кала андо Израилё бут время на сас брышын, о Иегова ԥэндя лэ пророкости Ильясти: «Жа андэ Сарепта. Котэ ек ԥивли лэла тэ праварэл тут». Кала о Илья авеля андо форо, паша вороты во додиқля ла жувля, сави стидэлас и кашта. Вой сас ԥивли. Во мангля ла тэ анэн лэсти паи. Кала вой жыля пала паи, о Илья ԥэндя: «Мангав тут, лэ пэса набут марно». Но вой ԥэндя: «Мандэ нисо нинай тэ хан. Ашэляпэ набут яро и вулей. Када на хутилэла даже важ мандэ и важ мэрно шаво». О Илья ԥэндя: «Сар о Иегова и дя алав, сар ту анэса манди набут марно, тутэ вся время авэла, со тэ хан, пока на жала о брышын».

И ԥивли жыля цэрэ и гитосардя марно важ лэ Иеговаско пророко. Сар и ԥэндя о Иегова, лэндэ сас, со тэ хан, дэкин на жыля о брышын. Лэндэ вся время сас андэ кувшиноря яро и вулей.

 Тоди кай и ԥивли стердяпэ бида. Лако бэято фартэ занасвайля и муля. Вой мангля, кай о Илья тэ поможый лати. О Илья ля латирэ бэятос и андярдя лэс упрэ пэстэ. Во стодя лэс пэ кровать и ля тэ мангэлпэ: «Иегова, мангав тут, жундяр кадэлэ бэятос». Кода, со во мангля, инке ни еқвар на сас. Ӷанэс васо? Жы кай кадэя время, скати амэ ӷанас, о Иегова никас на жундярэлас. Ай инке и ԥивли и лако бэято даже на слинэ израильтяноря.

И акэ о бэято ля тэ ԥурдэл, во жунделя! О Илья ԥэндя: «Дик, тиро бэято жундо». Вой фартэ обрадосайля и зацыписайля: «Акана мэ драго ӷанав, кай ту лэ Дэвлэско мануш. Всаворэ тирэ алава, савэ ту ԥэндян, терэнпэ!»