Na ngoi ti buru ni, Jéhovah atene na Élie: ‘Gue na kodro ti Zaréphath. Mbeni wali-mua ayeke kâ, lo yeke mû ande na mo kobe.’ Tongana Élie asi na yanga ti gbagba ti gbata ni, lo bâ mbeni wali-mua so angbâ ti ro keke. Lo hunda na lo ngu ti nyon. Na ngoi so lo gue ti tö ngu ni, Élie airi lo, atene: ‘Pardon, na gango ti mo, mo ga na mbi mbeni nduru mapa.’ Me wali-mua ni atene: ‘Mbi yeke na mapa ti mû na mo ape. Mbi yeke gï na kete farine nga na kete mafuta ti sara na ye ti tengo ndali ti mbi na molenge ti mbi.’ Élie atene na lo: ‘Jéhovah atene so tongana mo sara mapa na mbi, farine nga na mafuta ti mo ni ayeke hunzi ande ape juska na ngoi so ngu-nzapa ayeke kiri ti pika.’

Wali-mua ni ague na yanga-da, lo sara mapa ndali ti prophète ni. Gï tongana ti so Jéhovah atene, wali-mua so na molenge ti lo awara lakue kobe ti tengo ni na ngoi ti buru ni kue. Farine na mafuta ti lo ni ahunzi ape.

 Na pekoni, mbeni ye ti kpene asi. Terê ti kete molenge-koli ti wali-mua ni ason, na molenge ni akui. Élie avoro yanga na Jéhovah ti sara mbeni ye. Élie ayô molenge ni, lo monté na lo na chambre ti da ni so ayeke na nduzu. Lo zia lo na ndö ti gbogbo na lo sambela, lo tene: ‘Pardon, Jéhovah, kiri na molenge so na fini.’ Mo hinga ngbanga ti nyen la tongana Jéhovah asara ni ayeke tâ mbeni ye so apika bê? Ndali ti so ade mbeni zo azingo lani na kuâ ape. Na wali-mua so na molenge ti lo ayeke même azo ti Israël ape.

Molenge ni akomanse ti wu! Élie atene na wali-mua ni: “Bâ, molenge ti mo ayeke na fini!” Terê ti lo anzere mingi na lo tene na Élie, lo tene: ‘Mo yeke biani zo ti Nzapa. Mbi hinga ni ndali ti so mo tene gï atënë so Jéhovah atene na mo.’