FIANARA FAHA-48
Nivelo Ndraiky Anakilahini-Ampela Maty Valy Iny
Tamy fotoa tsy nampisy ora iny, le hoy Jehovah tamy Elia: ‘Mandehana a Zarefata any, fa misy ampela maty valy zay any hanome hany anao.’ Lafa niavy tamy vavahadini-tanà iny teo Elia, le nahita ampela mahantra nila katà. Nangatahany rano ampela io. Bakeo hoy ndraiky ie: ‘Mba anandeso mofo koa!’ Fe hoy ampela iny: ‘Tsy mana mofo azoko amea anao aho. Misy lafariny noho menaky kelikely zay avao aloha ty ao, fe hanamboarako mofo ho anay amy anakilahiko iny.’ Le hoy Elia: ‘Fa nivola Jehovah hoe laha ameanao mofo aho, le hisy lafariny noho menaky avao aminao ao zisiky hiaviani-ora io ndraiky.’
Noly amy zay ampela iny, le namboatsy mofo ho ani-mpaminanini- Jehovah io. Marina vatany safàni-Jehovah iny, satria nisy lafariny noho menaky avao tamin-drozy tao. Nana hany avao rozy tamy fotoa tsy nampisy ora iny.
Bakeo amy zay nisy raha mampalahelo. Narary marè anakilahini- ampela iny, farany nimaty. Nangatahiny Elia mba hanampy azy. Nalani-Elia taminy amy zay ajà iny, le nandesiny tamy efitsy anabo any. Nampiroroany tambony kitrely eo ajà iny, bakeo ie nivavaky ho zao: ‘Mba velomo lahy ajà toy Jehovah!’ Mahatseriky raha zay laha ataoni-Jehovah. Hainao va ty antony? Satria mbo tsy nisy olo maty nivelomy ndraiky zao mihintsy talohani-zay. Sady amy zay koa ampela iny noho anakiny iny tsy Israelita.
Fe nivelo ndraiky ajà iny! Hoy ty asani-Elia tamy ampela iny: ‘Toy anakinao iny ie velo.’ Nifalifaly biby ampela iny sady nivola tamy Elia hoe: ‘Haiko henanizao fa lahilahi-Ndranahary vatany iha, satria ze ampivolanini-Jehovah anao avao ro volaninao.’
“Mba diniho soa moa koaky rey! Tsy mamafy na mijinja zao rey, sady tsy mana trano fasia hany na fanajaria vokatsy, kanefa Ndranahary mamelo an-drozy. Tsy mbo lafovily marè mandilatsy voro rey va nareo?”—Lioka 12:24