Tamy i hamain-taney le hoe ty Jehovah tamy i Elia: ‘Mandehana ho a Zarefata agne, fa misy vantotse hagnomey hanegne azo ty agne.’ Naho fa niavy tam-bavahady i tanàgney eo ty Elia, le nahatrea ampela mahantra nangalake hatae. Nangatake rano naho mofo tama’e ty Elia. Faie hoe i ampelay: ‘Tsy managne mofo homeigne azo raho. Fa kedekede avao ka ze ao zay, faie hamboarako mofo ho anay miroanake.’ Hoe ty Elia: ‘Nisaontsy ty Jehovah tie tsy ho lany o lafarina naho o mena’ò, amparake ty itapera ty hamain-tane toy, naho mea’o mofo raho.’

Noly i ampelay, le namboatse mofo hoahy i Elia mpaminany i Jehovah. Maregne ty nisaontsie i Jehovah, satria nanagne lafarina naho menake ampe iareo, amparake ty nitapera i hamain-taney.

 Nisy loza niseho tafara izay. Narare ty ana i vantotsey le nimate. Nangatake i Elia hagnampe aze reke. Nalae i Elia tamy i rene’ey i ajajay, le nente’e tamy i tragno ambone aoy. Nampandre’e tambone fandreagneo i ajajay, le nivavake reke tie: ‘O Jehovah, velomo indraike ty ajaja toy.’ Ino ty maha fahagagagne lahibey izay? Satria mbe tsy nisy ndaty vinelogne tamy ty mate taloha izay sady iareo miroanake ka tsy Israelita.

Vinelo i Jehovah indraike i ajajay. Hoe ty Elia tamy i ampelay: ‘Io fa velogne i ana’oy.’ Fale i ampelay le hoe reke tamy i Elia: ‘Fantako amy izay fa mpanompon’Andrianagnahare vata’e rehe, satria ty saontsy i Jehovah avao ro rehafe’o.’