Pa nyengu yo kwenga nja, Yehova wangukambiya Eliya kuti: ‘Luta ku Zarefata. Munthukazi yo ndi choko wakukupasa chakurya.’ Eliya wati wafika pa geti la musumba wo, wanguwona munthukazi wachitondo nkhuni. Munthukazi mwenuyu wenga mukavu. Eliya wangumupempha maji ngakumwa. Munthukazi yo wati wasoka kuti wakato maji, Eliya wangudaniriza kuti: ‘Chondi undipaseku chiŵandi.’ Munthukazi yo wanguti: ‘Ndilivi chiŵandi chakuti ndikupasi. Nde ndi ufwa ndi mafuta vakuti ndinozge chakurya chimanavi chaku ini ndi mwana wangu.’ Eliya wangumukambiya kuti: ‘Yehova walayizga kuti asani undipangiyengi chiŵandi, ufwa ndi mafuta ngaku vimalengi cha mpaka po vuwa yiziyengi.’

Mwaviyo, munthukazi yo wanguluta kunyumba ndi kuchimupangiya chiŵandi muchimi waku Yehova. Nge mo Yehova wangulayizgiya, munthukazi yo ndi mwana waki ŵenga ndi chakurya pa nyengu yosi yo kwenga nja. Ufwa ndi mafuta vamalanga cha muviŵiya vo wasungangamu.

 Pavuli paki panguchitika chinthu chinyaki chakofya. Mwana wa munthukazi yo wenga choko wangutama ndipu pavuli paki wangufwa. Iyu wangupempha Eliya kuti wamuwovyi. Eliya wangulonda mwana yo mumanja mwa munthukazi yo ndipu wangumunyamuwa ndi kuluta nayu muchipinda chamuchanya cha nyumba yaki. Iyu wangumugoneka pa bedi ndipu wangupemphera kuti: ‘Yehova, chondi yuskani mwana uyu.’ Kumbi uziŵa chifukwa cho chatingi chiŵiyengi chakuziziswa kuti Yehova wayuski mwana yo? Nge mo tiziŵiya, kwamba kali pengavi yo wanguyuskikapu ndipu munthukazi yo limoza ndi mwana waki ŵenga Ayisraele cha.

Mwana yo wanguyuka ndipu wangwamba kututa. Eliya wanguti ku munthukazi yo: ‘Awona! Mwana waku ngwamoyu.’ Iyu wangukondwa ukongwa ndipu wanguti kwaku Eliya: ‘Iwi ndiwi nadi munthu waku Chiuta. Ndiziŵa venivi chifukwa ukamba vo Yehova wakutuma.’