Kʼalal kʼepel-a te kʼinale, te Jehová la yalbey te Elías: “Baan ta lum Sarepta. Ay jtul ants tey-a te jaʼ ya yakʼbat aweʼel”. Ta yochibal te mukʼul lume, te Elías la yil jtul meʼba ants te yak ta sleel siʼ, la skʼanbey jun baso jaʼ. Kʼalal bajtʼ sle tal te jaʼe, te Elías la yalbey: “Awokoluk, jaʼnix jich ya jkʼanbat jxejtʼuk pan”. Pero te meʼba ants jich la yal: “Maʼyuk pan kuʼun, maʼyuk bin ya xjuʼ kakʼbat. Jaʼnax ay kuʼun arina sok aceite yuʼun ya jweʼ sok te kale”. Te Elías jich la yalbey: “Te Jehová yaloj ta jamal, teme ya apasbon te tut pan mame xlaj te aceite sok te arina te jayeb kʼajkʼal ya xjalaj te kʼepel kʼinale”.

Jich te meʼba ants bajtʼ ta sna, la spasbey pan te j-alwanej yuʼun te Jehová. Te meʼba ants sok te yal maba laj te sweʼelik jich bitʼil yaloj ta jamal te Jehová te jayeb kʼajkʼal jalaj te kʼepel kʼinale. Maʼyuk bin-ora jochol jil te yoxomil te arina sok te aceite.

Ta patil ay bin mel-oʼtantik sba kʼot ta pasel. Te skerem-al te meʼba antse tsakot ta chamel te jich laje, te ants la yalbey wokol te Elías te yakuk xkoltayot yuʼune. Te Elías la skʼanbey te  skerem-ale. La spet moel ta skuarto te ay ta schaʼkajal te nae. La yakʼ ta wayibal sok la skʼopon te Jehová: “Jehová awokoluk, chaʼkuxajtesa te tut kerem ini”. ¿Yabal anaʼ bin yuʼun chajpnax-a te jich la spas te Jehovae? Jaʼ yuʼun te maʼyuk machʼa chaʼkuxajem ta skʼajkʼalel-abi. Jaʼnix jich te meʼba ants sok te yale, ma jaʼuk stsʼumbal te Israele.

Jich te tut kerem kaj yichʼ ikʼ, jich chaʼkuxaj. Te Elías la yalbey te meʼba ants: “¡Ilawil! Kuxulix te awale”. Kʼax tseʼel yoʼtan la yaʼiy sba yuʼun sok jich la yalbey te Elías: “Ta ora ini jnaʼojix te tikunbilat yuʼun te Diose. Te bin ya awale, talem ta stojol Jehová jaʼ yuʼun spisil ya xkʼot ta pasel”.